90 keli esirtki saqtaǵan mańǵystaýlyqqa sot úkimi shyqty

AQTAÝ. QazAqparat - Munaıly aýdanyndaǵy Atameken aýylynyń turǵyny úıinde 90 keli «keptirilgen marıhýana» saqtaǵany úshin 10 jylǵa bas bostandyǵynan aıyryldy, dep habarlaıdy Qazaqparat tilshisi.

Mańǵystaý oblysynyń mamandandyrylǵan aýdanaralyq qylmystyq ister jónindegi sotynda A-ǵa qatysty qylmystyq is qaraldy.

Sotta anyqtalǵandaı, Munaıly aýdanyndaǵy Atameken aýylynyń turǵyny A-nyń úıin tintý barysynda jalpy salmaǵy 90 keli «keptirilgen marıhýana» esirtki zaty tárkilengen. Atalǵan asa iri mólsherdegi esirtki zattardy ol zańsyz satyp alyp, odan ári satý úshin saqtaǵan.

Sot úkimimen A. QR Qylmystyq kodeksiniń 297-baby 3-bóligi 3-tarmaǵymen kináli dep tanylyp, oǵan 10 jyl merzimge bas bostandyǵynan aıyrý jazasy taǵaıyndaldy.

Úkim zańdy kúshine engen joq.