90 kelige jýyq bekireni úıinde zańsyz saqtaǵan atyraýlyq 3 jylǵa sottaldy
ATYRAÝ. KAZINFORM – Atyraýda 90 kelige jýyq bekire men 146 gramm qaraýyldyryqty úıinde zańsyz saqtaǵan 3 jylǵa sottaldy. Alaıda jazasyn óteý merzimi 3 jylǵa keıinge qaldyryldy.
Atyraý qalasyndaǵy №2 sotta azamat K.J.-ǵa qatysty qylmystyq is qaraldy. Oǵan QR Qylmystyq kodeksiniń 339-babynyń 2-bóliginiń 5-tarmaǵymen aıyp taǵylǵan.
– 2024 jylǵy 17 tamyzda tintý júrgizý kezinde K.J.-nyń Atyraý qalasyndaǵy úıinen zańsyz saqtalǵan 90 kg jýyq bekire balyǵy jáne 146 gramm bekire ýyldyryǵy alynǵan. Sottalýshynyń kinási tintý hattamasymen, sot-bıologııalyq, sot-taýartaný saraptamasynyń qorytyndylarymen dáleldendi, - dep habarlady sottan.
Prokýror sottalýshyǵa ósimdikter men janýarlardyń sırek kezdesetin jáne quryp ketý qaýpi tóngen, sondaı-aq tyıym salynǵan ósimdikter men janýarlar túrlerimen, olardyń bólikterimen nemese derıvattarymen baılanysty qyzmetpen aınalysý quqyǵynan 5 jyl, 3 jyl merzimge bas bostandyǵynan aıyrý túrindegi jazany taǵaıyndaýdy usyndy. QR Qylmystyq koleksiniń 74-babynyń 1-bóliginiń negizinde jazany óteýdi jas balalary 14 jasqa tolǵansha 3 jyl merzimge keıinge qaldyrýdy surady.
Alaıda aıyptalýshy men onyń qorǵaýshylary taǵylǵan aıyppen kelisken joq. Olar aqtaýdy surady.
Aıyptalýshynyń asyraýynda úsh jas balasy bar. Bul jaza men qylmystyq jaýaptylyǵyn jeńildetetin mán-jaı retinde tanyldy. Jazany aýyrlatatyn mán-jaı anyqtalmady.
– Sot úkimimen K.J. taǵylǵan aıyp boıynsha kináli dep tanyldy. Oǵan ósimdikter men janýarlardyń sırek kezdesetin jáne quryp ketý qaýpi tóngen, sondaı-aq tyıym salynǵan ósimdikter men janýarlar túrlerimen, olardyń bólikterimen nemese derıvattarymen baılanysty qyzmetpen aınalysý quqyǵynan 5 jyl merzimge aıyra otyryp, 3 jyl merzimge bas bostandyǵynan aıyrý túrindegi jaza taǵaıyndaldy. Jazany óteý merzimi jas balalary 14 jasqa tolǵansha 3 jyl merzimge keıinge qaldyryldy, - dep málim etti sottan.
Sot úkimi zańdy kúshine engen joq.
Eske sala ketelik, budan buryn elimizdiń batysynda «Bekire – 2025» keń aýqymdy balyq qorǵaý aktsııasy bastalǵanyn jazǵan edik.