90 ıt mekendeıdi: Iesi óltirilgen «Dog House» panajaıynyń bolashaǵy ne bolady
QONAEV. KAZINFORM – Almaty oblysynyń ákimdigi Jambyl aýdanynyń Sholaqqarǵaly aýylyndaǵy «Dog House – Tvardovskıı dom» jeke panajaıyna qatysty málimdeme jasady.
Oblys ákimdiginiń málimetinshe, qazir ıtterdiń qaýipsizdigin qamtamasyz etý máselesi baqylaýda. Atap aıtqanda «Dog House – Tvardovskıı dom» jeke panajaıynda qalǵan ıtterge kómek kórsetý, olardyń qaýipsizdigin qamtamasyz etý jáne tıisti jaǵdaı jasaý boıynsha jumystar júrgizilip jatyr.
- Panajaı ıesi Vladımır Teplıakovty jerleý rásimi aıaqtalǵannan keıin marqumnyń dosy Ramzan Batsalov Sholaqqarǵaly aýylyndaǵy panajaıda qalǵan 90 ıtti Myńbaev aýyldyq okrýginde ornalasqan jeke pıtomnıgine alyp ketýge daıyn ekenin bildirdi. Qazirgi ýaqytta ıtterdi qaýipsiz tasymaldaý jáne tıisti jaǵdaılarǵa ornalastyrý máseleleri pysyqtalyp jatyr, - dep habarlady ákimdikten.
Atalǵan másele Almaty oblysynyń ákimdigi baqylaýynda ekeni atap ótildi.
Eske salaıyq, Almaty oblysynda «Dog House — Tvardovskıı dom» ıesiz janýarlar panajaıynyń negizin qalaýshy Vladımır Teplıakov mert boldy. Polıtsııa 7 qazanda «Adam óltirý» boıynsha qylmystyq is qozǵady. Qazir qylmysqa qatysy bar adamdardy anyqtap, ustaýǵa baǵyttalǵan tergeý jáne jedel-izdestirý sharalary júrgizilip jatyr.
