90-ǵa jýyq nesıe beretin uıym lıtsenzııasynan aıyryldy
ASTANA. KAZINFORM – Byltyr mıkrokredıt beretin uıymdarǵa 155 mln teńge somasyna aıyppul salyndy. Bul týraly QR Qarjy naryǵyn retteý jáne damytý agenttigi tóraǵasynyń orynbasary Oljas Qızatov aıtty.
«Agenttik mıkrokredıt berý sýbektileriniń qyzmetin turaqty túrde tekseredi. Máselen, 2023 jyly 370 tekserý júrgizildi. Onyń qorytyndysy boıynsha 198 qadaǵalaý sharasy qabyldandy, 155 mln teńge somasyna 529 aıyppul salyndy», - dedi O.Qızatov Ortalyq kommýnıkatsııalar qyzmetindegi baspasóz máslıhatynda.
Bul turǵyda mıkroqarjy uıymdarynyń 60 kún qaryz tólenbese de mıkrokredıtter berýi, esepteý talaptaryn buzýy, kredıttik bıýroǵa aqparatty ýaqytyly usynbaýy jáne syıaqynyń shekti mólsherlemesinen asyp ketýi sııaqty kemshilikteri anyqtaldy.
«Qadaǵalaý qyzmetiniń qorytyndysy boıynsha 88 mıkrokredıt berý sýbektisi, onyń ishinde 16-sy májbúrli túrde lıtsenzııasynan aıyryldy», - dedi agenttik ókili.
