9 jylda 900 saǵat: Sırııaǵa alǵashqy kómekti jetkizgen qazaqstandyq ushqysh

ASTANA. KAZINFORM — Ulttyq ulan avıatsııasynda aspandy baǵyndyryp qana qoımaı, qıyn sátterde batyldyq tanytyp júrgen kásibı mamandar az emes. 

Solardyń biri — 9 jyl ishinde áýe keńistiginde 900-den astam saǵat ótkizgen keme komandıri Berikbolsyn Habıbolla. Mektep qabyrǵasynda júrip-aq alǵash ret ushaq tizgindegen ushqyshtyń ómir joly men Sırııadaǵy gýmanıtarlyq mıssııasy týraly aıtyp berdi.

Berikbolsynnyń ushqysh bolýyna naǵashy aǵasynyń yqpaly zor bolǵan. Kishkentaı kezinen áýejaıda ushaqtardy kórip ósken ol 9-synypta Astanadaǵy azamattyq avıatsııa ortalyǵyna qabyldanady. Densaýlyǵy da jarap, testileýden múdirmeı ótken jasóspirim mektepten keıin qosymsha sabaqtarǵa qatysyp, alǵash ret aspanǵa kóterilgen.

— Bul meniń áýe kemesine birinshi ret kóterilýim edi. Azamattyq avıatsııa ortalyǵy mektepterden jasóspirimderdi tańdap, emtıhan alyp, kishkentaı ushaqpen ushýǵa múmkindik berdi. Naǵashy aǵam da ushqysh bolǵandyqtan, áýe kemeleri maǵan burynnan jaqyn edi. Almatydaǵy Azamattyq avıatsııa akademııasynda oqyp júrip, Latvııa, Lıtva, Estonııa, Germanııa men Ispanııada tájirıbeden óttim. Piper, Cessna, Texan ushaqtary men tikushaqtardy basqarýdy úırendim, — deıdi Berikbolsyn Habıbolla Jibek Joly telearnasynyń Bugin LIVE baǵdarlamasynda.

Ushqyshtyń aıtýynsha, Túrkııa men Sırııadaǵy joıqyn zilzala kezinde Ulttyq ulannyń E8 kólik ushaǵy Sırııaǵa eń alǵashqylardyń biri bolyp gýmanıtarlyq kómek jetkizdi. Baılanys pen navıgatsııa qıyndyqtaryna qaramastan, tapsyrmany minsiz oryndaǵan Berikbolsyn «Jaýyngerlik erligi úshin» medalimen marapattaldy.

— Sırııaǵa gýmanıtarlyq kómekti biz birinshi bolyp jetkizdik. Bul jaǵdaıda baılanys pen navıgatsııa boıynsha qıyndyqtar kóp bolady. Al aspandaǵy eń erekshe sátterdiń biri — Barselonanyń ústinde ushyp bara jatqan kezim edi. Tómende jańbyr, sur bult, biraq bultty tesip shyqqanda kún tek maǵan ǵana janyp turǵandaı sezildi. Ondaı kórinisti sezingen adam aspannan eshqashan shyǵa almaıdy, ol júrekte máńgilik qalady, — dep aǵynan jaryldy ushqysh.

Búginde Berikbolsyn Ulttyq ulanda aptasyna 3-4 ret oqý-jattyǵý ushýlaryn ótkizip, kez kelgen aýa raıy jaǵdaıynda áýe kemesin basqarý sheberligin shyńdap júr. Onyń aıtýynsha, ushqysh bolý úshin tek fızıka men matematıkany bilý jetkiliksiz, temirdeı tártip pen myqty densaýlyq qajet.

Aıta keteıik, buǵan deıin Aqtóbe aýmaǵynda qutqarý, naýqastardy tasymaldaý tapsyrmalaryn oryndaıtyn jas ushqysh Bıtóre Orazbaımen qyzmeti jaıly suhbat qurǵan bolatynbyz.