9 jastaǵy almatylyq qyz Qyrymdaǵy djaz festıvalinde óner kórsetti
ALMATY. QazAqparat - 9 jasar almatylyq qyz Alına Sansyzbaı Qyrymdaǵy djaz festıvalinde óner kórsetti, dep habarlaıdy QazAqparat tilshisi.
«Golos. Detı 4» shoýynyń fınalısi Koktebel Jazz Party kórermenderin tań-tamasha qaldyrdy. Halyqaralyq festıval 18-20 tamyz aralyǵynda ótken.
Jas ánshi Voloshın sahnasynda sharanyń ashylý saltanatyna qatysty.
Alına «Think» kompozıtsııasyn belgili djaz mýzykanty Valerıı Ponomarevtyń súıemeldeýimen oryndady.
«Maǵan festıval óte unady. Belgili ártister kóp boldy. Bárinen de teńiz unady. Qyrymǵa qaıtyp kelemin bolashaqta», - dedi ol.
Ánshi qyz 10 qyrkúıekte Astanaǵa keledi. EKSPO sahnasynda Roza Rybaeva men A-stýdıo toptarymen qosylyp án aıtpaq.
Aıta ketý kerek, byltyr Alına Sansyzbaı Reseıdegi «Golos» shoýynda úshinshi orynǵa taban tiregen bolatyn.
2 jyl buryn Alına Máskeýdegi «Pokolenıe NEXT» festıvalinde gran-prı utyp alǵan edi.
