9 jastaǵy ulyn uryp-soqqan taldyqorǵandyq áıel ana quqynan aıyrylady - ombýdsmen
TALDYQORǴAN. KAZINFORM. Balasyn sýyq qoraǵa qamap, ózi qydyryp ketken taldyqorǵandyq áıel ata-ana quqyynan aıyrylýy múmkin. Bul týraly Jetisý oblysynyń Balalar obýdsmeni Raıhan Sısekenova málimdedi.
Toǵyz jasqa endi tolatyn Artem Lebedevtiń kórmegen quqaıy joq eken. Balaqaıdy basqa emes, óziniń týǵan anasy uryp, soqqan. Ol az bolǵandaı, jaýapsyz ana balany únemi qaraýsyz qaldyryp, sýyq qoraǵa qamap ketip júripti.
Artemniń aýyr jaǵdaıyn áleýmettik qyzmetke kórshileri habarlaǵan. Sodan keıin Adam quqyǵyn qorǵaý bıýrosynyń Jetisý oblystyq fılıaly mamandarynyń bastamasymen komıssııa qurylyp, Lebedevter otbasynyń jaǵdaıymen tanysqan. Belgili bolǵandaı, Artemniń anasy Svetlana ishkilikke salynǵan eken. Ol týǵan ulyn únemi uryp, úıge qamap ketip otyrǵan. Oqıǵadan keıin komıssııa balany týǵan úıinen alyp, Beıimdeý ortalyǵyna ornalastyrǵan.
- Toǵyz jasqa tolmaǵan Artemniń jaǵdaıy qıyn. Ol toıyp tamaq ishpegen, únemi anasynan taıaq jep ósken. Balany sýyq qoraǵa qamap ustaǵan. Biz áleýmettik qyzmetkerlermen birlesip ol úıdiń jaǵdaıyn kórdik. Qazir balasyn uryp-soqqan áıeldi ata-ana quqynan aıyrý máselesi kún tártibine qoıyldy, - dep habarlady Jetisý oblysynyń Balalar obýdsmeni Raıhan Sısekenova.
