9 jastaǵy bala kólik júrgizgen: Qyzylorda polıtsııasy mán-jaıdy anyqtady
QYZYLORDA. KAZINFORM — Qyzylordalyq polıtsııa qyzmetkerleri anyqtaǵandaı, kámeletke tolmaǵan balanyń avtokólik basqarǵany beınelengen vıdeo áleýmettik jelige júktelgen.
Oqıǵa Aral aýdany kósheleriniń birinde kúndizgi ýaqytta bolǵan.
— Beınejazbany zerdeleý barysynda 9 jastaǵy balanyń «Toyota Sienna» markaly avtokólikti basqarǵany belgili boldy. Tekserý nátıjesinde avtokóliktiń balanyń ákesine tıesili ekeni anyqtaldy. Tekserý qorytyndysy boıynsha kámeletke tolmaǵan balanyń zańdy ókili bala tárbıesi men onyń qaýipsizdigin qamtamasyz etý jónindegi mindetterin tıisinshe oryndamaǵany úshin ákimshilik jaýapqa tartyldy. Sot sheshimimen ata-anasyna ákimshilik aıyppul salyndy, — dep málimdedi oblystyq polıtsııa departamenti.
Tártip saqshylary profılaktıkalyq túsindirý jumysyn júrgizdi. Polıtsııa ata-analarǵa balalardyń qaýipsizdigine erekshe jaýapkershilikpen qaraýdy eskertedi.
— Kámeletke tolmaǵandardyń kólik quraldaryn basqarýyna jol bermeńizder. Avtokólik kiltterin balalardyń qoly jetpeıtin jerde saqtap, olardyń qaýipsizdigine árdaıym nazar aýdaryńyzdar, — delingen habarlamada.
Eske salaıyq, Qazaqstanda sońǵy bes kúnde kólik júrgizý quqyǵynan aıyrylǵanyna qaramastan, rólge otyrǵan 245 júrgizýshi ustaldy, dep habarlady Іshki ister mınıstrligi.