9 túlek keshendi testileýde eń joǵary nátıje kórsetti - BǴM
ASTANA. QazAqparat - 19-22 shilde aralyǵynda respýblıkanyń 42 oqý oryndary bazasynda ótken keshendi testileý qorytyndysynda 9 túlek keshendi testileýdiń eń joǵary balyn jınady.
Bul týraly búgin QR Prezıdenti janyndaǵy Ortalyq kommýnıkatsııalar qyzmetinde keshendi testileý qorytyndylaryna baılanysty ótken brıfıng barysynda Bilim jáne ǵylym vıtse-mınıstri Tahır Balyqbaev málim etti.
Eske salaıyq, keshendi testileý joǵary oqý oryndaryna túskisi keletin ótken jyldardyń mektep bitirýshilerine jáne kásiptik-tehnıkalyq bilim berý uıymdarynyń, kolledjderdiń túlekterine arnalady.
«Keshendi testileý barysynda túlekterdiń tyıym salynǵan uıaly telefon, shpargalka, kalkýlıator syndy quraldardy paıdalanǵandary da boldy. Sondyqtan da, keshendi testileýdi ótkizý barysynda 46 myń 800-den astam tyıym salynǵan quraldar alyndy. Sonymen qatar, túlekterdiń ornyna kirip synaq tapsyrmaq bolǵan 49 azamat anyqtaldy, erejeni buzǵany úshin birqatar túlek testileý barysynan shyǵaryldy», - dedi T. Balyqbaev.
Onyń aıtýynsha, respýblıkalyq apellıatsııalyq komıssııaǵa keshendi testileýge qatysýshylardan 27 shaǵym kelip túsken. Olardyń 3-eýi qanaǵattandyrylǵan.
