9 sport jýrnalısine «Aqparat salasynyń úzdigi» tósbelgisi berildi
ASTANA. KAZINFORM - BAQ qyzmetkerleri kúnine oraı birqatar sport jýrnalıstıkasynyń ókilderi «Aqparat salasynyń úzdigi» tósbelgisimen marapattaldy. Salalyq jýrnalıstıkanyń úzdikteri qatarynda Kazinform agenttiginiń tilshisi de bar.
Kúnsultan Otarbaı 2014 jyldan beri Kazinform agenttiginde qyzmet atqaryp keledi, oǵan deıin «Qazaq sporty», «Sport» gazetterinde tilshi bolǵan. 2014 jyly Sochıdegi qysqy Olımpııa oıyndary, 2016 jylǵy Rıo-De Janeıro Olımpıadasy, 2017 jyly Inchhonda ótken Azııa oıyndary jáne 2024 jylǵy Parıj Olımpıadasynan habar taratqan kásibı jýrnalıst. Seıdahmet Berdiqulov atyndaǵy arnaıy syılyqtyń laýreaty.
«Aqparat salasynyń úzdigi» tósbelgisimen marapattalǵandar:
- Ivan Rezvantsev – «Dıadıa Vanıa» aqparattyq arnasynyń bas redaktory (sport jýrnalıstıkasynda 31 jyldan beri eńbek etip keledi);
- Anton Alekseev – «Tengrı sport» aqparattyq portalynyń redaktory;
- Kúnsultan Otarbaı – «Kazinform» halyqaralyq aqparat agenttiginiń tilshisi;
- Tahır Hamrakýlov – Sport12 aqparattyq portalynyń bas redaktory;
- Aqyrys Seıtqazy – Sportbugin.kz aqparattyq portalynyń bas redaktory;
- Azamat Jolamanov – «Sport Shredınger» aqparattyq portalynyń redaktory;
- Dmıtrıı Nesterenko – «Sport+ Qazaqstan» telearnasynyń redaktor-tilshisi;
- Turlyjan Áıtenov – KazSports.kz saıtynyń redaktor-tilshisi;
- Álı Bıtóre – Bairak.kz aqparattyq-saraptamalyq portalynyń redaktory.
QR Mádenıet jáne aqparat mınıstrliginiń vedomstvolyq marapaty QR Týrızm jáne sport mınıstrliginde tabystaldy. Mádenıet jáne aqparat mınıstri Aıda Balaevanyń tapsyrmasymen marapatty QR Mádenıet jáne aqparat mınıstrligi Aqparat komıtetiniń tóraǵasy Álisher Muqajan tabystady. Іs-sharaǵa Týrızm jáne sport mınıstriniń orynbasary Serik Jarasbaev qatysty.
Aıta keteıik, «Aqparat salasynyń úzdigi» tósbelgisi – Mádenıet jáne aqparat mınıstrliginiń vedomstvolyq marapaty. Tósbelgi joǵary kásibı sheberligi jáne otandyq buqaralyq aqparat quraldarynyń damýyna qosqan eleýli úlesi úshin tabystalady.
Osyǵan deıin Memleket basshysy Prezıdent Teleradıokesheniniń qyzmetkerlerin marapattaǵan bolatyn.
