9-synyp oqýshysy kún energııasyn paıdalanýdyń tıimdiligin arttyratyn ınnovatsııalyq joba jasady

 ASTANA. KAZINFORM – 9-synyp oqýshysy Jeńis Bojaev ınnovatsııalyq joba usyndy.

Oqý-aǵartý mınıstrliginiń málimetinshe, onyń ónertabysy kún energııasyn turmystyq qajettilikterge paıdalanýǵa múmkindik beredi.

Oqýshynyń aıtýynsha, onyń jobasy kómirge, otynǵa jáne elektr energııasyna táýeldilikti azaıtyp, ekologııaǵa zııandy áserdi tómendetýge arnalǵan. Ol úshin Jeńis áýeli kún kollektorynyń syzbasyn ázirlep, bólshekterden qondyrǵyny qurastyrýdan bastady.

 

«Kollektordy qurastyrý kezinde aǵash karkas pen penopleks jylý ızolıatsııasyn qoldandym. Osylaısha, júıeniń qos qabatty shyny arqyly germetıkalyq tyǵyzdyǵyn qalyptastyrdym. Jylý akkýmýlıatory retinde arnaıy ydysty qoldana otyryp, tıimdiligin synaqtan ótkizdim. 0,33 m² kólemindegi kollektor qurylǵysy 30°C temperatýraǵa deıin qyzý berip, kúni boıy 2 142 000 Dj energııa jınaı alatynyn kórsetti. Jobany júzege asyrý arqyly týǵan ólkemniń ekologııasyn jaqsartýǵa úles qosamyn dep senemin», – deıdi jas ónertapqysh.

Onyń aıtýynsha, kún kollektory arqyly aýyl sharýashylyǵy men turmystyq ǵımarattardy jylytýǵa jáne sý qajettilikterin qamtamasyz etýge bolady. Aýyl sharýashylyǵy úshin 30-90°C aralyǵyndaǵy sý qajet ekenin eskergen oqýshy bul júıeniń óńir turmysyn jaqsartýǵa septigin tıgizetinine senimdi. 

Atalǵan qurylǵy synaqtan ótti. Oqýshynyń esepteýinshe, 23 m² aýmaqty qamtıtyn kún kollektory arqyly ortasha úıdiń ishin jylytýǵa jáne ystyq sýmen qamtamasyz etýge bolady. Mundaı qurylǵyny úıdiń tóbesine ornalastyrý tıimdi ári keńistikti únemdeıdi.

Qazaqstandyq kolledj stýdentteri NASA ǵaryshtyq qosymshalar baıqaýynda óz jobalaryn usynatynyn jazǵan bolatynbyz.