9 óńirde bıýdjet kiristeriniń jospary oryndalmady
ASTANA. KAZINFORM — Bıyl 9 aıdyń qorytyndysynda 9 óńir jergilikti bıýdjet kiristeriniń josparyn oryndaı almady. Bul týraly Úkimet otyrysynda Qarjy mınıstri Mádı Tákıev aıtty.
Mınıstr dereginshe, bıyl 9 aıda jergilikti bıýdjettiń kiristeri 6,9 trln teńgeni qurap, 96,1%-ǵa oryndaldy. Atalǵan kiris kóleminiń ótken jylmen salystyrǵanda ósý qarqyny 102%-ǵa jetip, 125,6 mlrd teńgege artyq oryndalyp otyr. Al bıýdjet qarajatynyń kem túsý kólemi 278,3 mlrd teńgeni qurady.
— Jalpy, jospar 9 óńirde oryndalmady, onyń ishinde basym aýytqý Atyraý, Pavlodar jáne Mańǵystaý oblystarynda boldy. Osyǵan baılanysty árbir óńirde menshikti kiris áleýetin paıdalanǵan jón. Ákimdikter memlekettik kirister organdarymen birlese otyryp, jyl sońyna deıin qosymsha túsimderdi qamtamasyz etetin naqty sharalardy qarastyrýy qajet, — dedi ol.
Mádı Tákıevtiń málimetinshe, memlekettik bıýdjet shyǵystary — 98%-ǵa atqarylyp, qarjylandyrý kólemi 26,2 trln teńgeni qurady. Respýblıkalyq bıýdjet 99,6%-ǵa atqarylyp, shyǵystar 19,6 trln teńge boldy.
Onyń ishinde:
— zeınetaqy men járdemaqyǵa — 5,3 trln teńge;
— óńirlerdi qoldaýǵa — 4,4 trln teńge;
— naqty sektordy qoldaýǵa — 2 trln teńge baǵyttaldy.
— Bul rette jergilikti bıýdjetterdiń shyǵystary 96,3%-ǵa atqarylyp, 11,9 trln teńgege jetse, atqarylmaǵan qarjat kólemi 458,4 mlrd teńgeni qurady, — dedi mınıstr.
Osyǵan oraı ol Premer-mınıstr Oljas Bektenovten ákimdikter men bıýdjettik baǵdarlamalar ákimshilerine osy jyldyń aıaǵyna deıin bıýdjette kózdelgen parametrlerdiń merziminde jáne sapaly atqarylýy úshin qajetti sharalar qabyldaýdy tapsyrýdy surady.
Buǵan deıin respýblıkalyq bıýdjet kiristeriniń ósýine qandaı faktorlar áser etkenin jazǵan edik.
