9 naýryzda eldegi qaı joldarda qozǵalys shekteldi

ALMATY. KAZINFORM – «QazAvtoJol» ulttyq kompanııasy eldegi joldardyń qazirgi ahýaly týraly habarlady.

Qolaısyz aýa raıyna baılanysty respýblıkalyq mańyzy bar avtojoldardyń kelesi ýchaskelerinde kólik qozǵalysy shekteldi:

Ulytaý oblysy

• «Jezqazǵan – Arqalyq – Petropavl» avtojolynyń 137–252 shaqyrym aralyǵy (Ulytaý qalasy – Qostanaı oblysynyń shekarasy).

Pavlodar oblysy

• «Astana – Shiderti – Pavlodar – Ýspenka – RF shekarasy» avtojolyndaǵy «Qalqaman» jolaıryǵy ýchaskesinde (Qalqaman kentine kireberis pen Astana baǵytyna shyǵar jol) qozǵalys shektelgen.

Sonymen qatar Shyǵys Qazaqstan oblysyndaǵy Osınov asýynda tirkemesi bar jáne jartylaı tirkemeli júk kólikteriniń qozǵalysy ýaqytsha shekteldi. Shekteý «Óskemen – Altaı – Katonqaraǵaı – Rahman qaınary» avtojolynyń 46-66-shaqyrymyndaǵy (Severnoe aýyly – Serebrıansk qalasy) ýchaskesinde qys maýsymy aıaqtalǵansha saqtalady.

Eske salaıyq, buǵan deıin sınoptıkter 9 naýryzda elimizdiń birqatar óńirinde aýa raıyna baılanysty eskertý jasaǵan edi.