9 myńǵa jýyq oqýshyǵa oryn jetispeıdi: Abaı oblysynda mektep tapshylyǵynan balalar qysylyp oqýǵa májbúr

SEMEI. QazAqparat – Abaı oblysynda túıini tarqatylmaǵan túıtkildi máseleler az emes. Sonyń ishinde jurttyń kóbi mektep tapshylyǵy jaıly jıi sóz qozǵap júr. Tipti Semeı qalasynyń ózinde oqýshylar qysylyp oqýda. Jańadan qurylǵan oblystyń ortalyǵy bolǵandyqtan mektepterdegi bala sany odan saıyn kóbeıe beretini aıtpasa da túsinikti. Osy rette, QazAqparat tilshisi máseleniń mánisine úńilip kórgen bolatyn.

«Aıadaı bólmelerde eki ǵana tereze bar»

Qyrkúıek aıynda óńirge kelgen Prezıdent Qasym-Jomart Toqaev Abaı oblysynyń Qazaqstan tarıhyndaǵy orny erekshe ekenin atap ótken.

Foto: akorda.kz

«Semeı – ulttyq ǵylym men bilimniń, óner men mádenıettiń tarıhı ortalyǵy. Elimizdegi muǵalimder daıarlaıtyn alǵashqy oqý orny budan 120 jyl buryn osy qalada ashylǵany belgili. Onda Muhtar Áýezov, Júsipbek Aımaýytov, Qanysh Sátbaev, Álkeı Marǵulan, Sháken Aımanov syndy ult zııalylary bilim alǵan», - dedi Memleket basshysy.

Biraq dál qazir Abaı oblysynda mektep tapshylyǵy máselesi óte ózekti bolyp tur. Aımaq boıynsha 9 myńǵa jýyq balaǵa oryn jetispeıdi. Prezıdent óz sózinde osy jaıly da basa aıtty.

«Úkimet pen ákimdikke Abaı oblysy mektepterindegi oryn tapshylyǵy máselesin birjola sheshýdi tapsyramyn. Biz ustazdy qurmet tutqan elmiz. Bul sózimiz naqty ispen bekitilip jatyr. Arnaıy Oqý-aǵartý mınıstrligi quryldy. Buǵan deıin «Pedagogtardyń mártebesi týraly» Zań qabyldap, onyń aıasynda muǵalimderdiń jalaqysyn ósirdik. «Álippeni» qaıtardyq. Orta bilimdi damytýǵa baǵyttalǵan birqatar jaǵymdy ózgeris bar. Osyndaı ıgi sharalar arqyly qoǵamda muǵalimniń mártebesin odan ári bıiktetemiz», - dedi Qasym-Jomart Toqaev.

Semeı qalasynda da oqýshylar jańa mektepterge zárý. Tipti shahardaǵy aldyńǵy qatardaǵy bilim ordalarynyń biri sanalatyn №6 mektep gımnazııada balalar qysylyp oqýda. Naqty aıtqanda, 912 orynǵa shaqtalǵan mektepte 1843 oqýshy bilim alyp jatyr.

«Negizinen bul ǵımarat balet mektebi retinde 1984 jyly boı kótergen. 1988 jyly bizdiń mektep osynda kóship keldi. Sebebi oǵan deıingi nysan apattyq jaǵdaıda dep tanyldy. 2010 jyly bilim ordasyna ǵımnazııa statýsy berilgen. Qaıym Muhamedhanov kóshesinde ornalasqan mektebimizge oqýshylar qalanyń túkpir-túkpirinen kelip oqıdy. Sol úshin balalar syımaı jatyr. Kabınetterdiń ishi tym tar. Ǵımarat alǵash mektep retinde salynbaǵandyqtan aıadaı bólmelerde eki ǵana tereze bar», - dedi bilim ordasynyń dırektory Maıra Ahmetova.

Tórt qabatty mekteptiń jalpy aýdany - 1612 sharshy metr. Pándik kabınetter sany - 69. Munda barlyǵy 150 adam qyzmet etse, onyń ishinde 126-y - muǵalim.

«Bıyl birinshi synypqa 150 oqýshynyń ornyna 283 bala qabyldanǵan. Gımnazııa bolǵan soń osynda bilim alýǵa qulshynys tanytatyndar jyldan-jylǵa kóbeıip keledi. Bizde bilim sapasy óte joǵary. Jańa oblys qurylǵannan keıin qalaǵa jan-jaqtan túrli mamandar kóship kelýde. Olar da balalaryn mektebimizge berýge nıet bildirýde. Sondyqtan bizge jańa mektep salynsa degen tilegimiz bar», - dedi Maıra Ahmetova.

Qansha mektep salynady?

Kópti tolǵandyrǵan kúrdeli máseleniń kúrmeýi qalaı sheshiletindigin bilý úshin QazAqparat tilshisi oblys jáne qala ákimdikterine habarlasyp kórdi.

«2025 jylǵa deıin Abaı oblysynda 11 mektep salynady. Ol 5 myńnan asa oqýshyny qamtıdy. Qosymsha 4 myń orynǵa oqý ǵımaratyn salamyz. Olardyń jobalyq-smetalyq qujattamasy daıyndalyp jatyr», - dep habarlady óńir ákimdiginiń baspasóz qyzmeti.

Al Semeı qalasy Bilim bóliminiń dereginshe, búginde shahar boıynsha barlyǵy 68 mektep bar. Onyń ishindegi 23 mektepte 5956 oqýshyǵa oryn jetispeýshiligi sezilýde. Aldaǵy 3 jylda 3600 oryndyq 5 mektep salý josparlanyp otyr. Jańa úıler boı kóterip jatqan «Qaraǵaıly» shaǵyn aýdanynda eki mektep salynbaq. 1200 oryndyq bir mektep 2024 jyly, 900 oryndyq bilim ordasy 2025 jyly boı kóteredi.