9 myńǵa jýyq dáriger sheteldik klınıkalarda biliktiligin arttyrady – ShQO
ÓSKEMEN. QazAqparat - Aldaǵy úsh jylda toǵyz myńǵa jýyq oblys dárigeri ozyq sheteldik klınıkalarda biliktilikterin arttyratyn bolady. Olar - Anglııa, Izraıl, Lıtva, Reseı, Polsha, Koreıa, Ýkraına, Italııa memleketteriniń medıtsınalyq ortalyqtary, dep habarlaıdy QazAqparat oblys ákiminiń baspasóz qyzmetine silteme jasap.
Sońǵy úsh jylda 5511 dáriger, onyń ishinde 276-sy álemniń jetekshi klınıkalarynda biliktilikterin jetildirdi. Bul dárigerlerdi daıarlaýdyń úsh deńgeıli baǵdarlamasy aıasynda júzege asyrylyp keledi. Atap aıtsaq, oblysta densaýlyq saqtaýdy damytýdyń keshendi jospary júzege asyrylýda. Úsh jyl ishinde 1080 jańa medıtsınalyq jabdyq satyp alyndy. Robotohırýrgııa, polıtravma, ortopedııa jáne oftalmohırýrgııa ortalyqtary ashyldy. Sondaı-aq, Semeıdegi jedel medıtsınalyq kómek aýrýhanasy negizinde gıbrıdti operatsııa zaly ashyldy. Altaı jáne Aıagóz aýdandarynyń ortalyqtarynda ІІ deńgeıli ınsýlt ortalyqtary quryldy.
«Aımaqtyq medıtsınaǵa úzdik tehnologııa men ınnovatsııalyq emdeý tásilderiniń engizilýine baılanysty dárigerlerdiń biliktiligin arttyrý basty nazarǵa alynyp otyr», - deıdi oblys ákimi Danıal Ahmetov.
