9 myń qazaqstandyq «Nur Otan» praımerızine ótinish berdi

NUR-SULTAN. QazAqparat – Osydan 10 kún buryn elimizde «Nur Otan»-nyń partııaishilik irikteýi – praımerızge qatysý úshin ótinishter qabyldaý bastaldy. Qysqa merzim ishinde 9 myńnan astam adam óz ótinishterin joldap úlgerdi. Olardyń 34,7%-y – áıelder, 26,7%-y – 35 jasqa deıingi jastar. Bastaýysh partııa uıymdarynan 2905 adam usynylsa, 6258 kandıdat – ózin-ózi usynǵandar, dep habarlaıdy QazAqqparat tilshisi.

Partııaishilik saılaýǵa qarapaıym partııa músheleri ǵana emes, belgili qoǵam belsendileri, ataqty sportshylar, mádenıet qaıratkerleri jáne t. b. qyzyǵýshylyq tanytýda.

Solardyń biri – shahmatshy Jansaıa Ábdimálik. Ol Almaty qalalyq máslıhatyna saılaý úshin partııalyq tizimge kandıdat bolý quqyǵyn ıelený maqsatynda dodaǵa túsýdi josparlap otyr.

«Nur Otan» partııasy qaıta jandandyrý týraly aıtýda. Eldegi reformalar maqsatshyl jáne órshil jastardyń qatysýymen jasalýy kerek dep esepteımin», - dep jazdy ol óziniń Instagram paraqshasynda.

Qoǵam belsendisi, «Pandýs-OK» JShS-niń basshysy Shahan Joldasbaev erekshe qajettilikteri bar adamdarǵa qalalyq ortany yńǵaıly etý máselesine alańdaýly.

«Qarapaıym dúnıelerdiń ózine qol jetkize almaı otyrǵanda, odan ózgesi týraly aıtýdyń ózi artyq. Shyndyǵynda, biz sııaqty jandarǵa qajettiniń bári jazylyp, nusqaýlyq berilip qoıǵan, tek olar oryndalmaıdy. Máslıhatta ár sala boıynsha osy baǵyt úshin kúresip, sheneýnikterge bosańsýǵa jol bermeıtin adam qajet. Ózimniń 10 jylǵa jýyq qoǵamdyq jumystaryma, úlken yqylas pen tájirıbeme súıene otyryp, erekshe qajettilikteri bar azamattardy tolǵandyratyn kóptegen áleýmettik máselelerdi sheshýge óz úlesimdi qosqym keledi», - dedi Shahan Joldasbaev.

Aqtóbe oblystyq drama teatrynyń dırektory, belgili akter Oljas Ibraev aýyl jastaryna qoldaý kórsetýmen aınalyspaq.

«Aýylda týyp-óstim, sondyqtan meniń basty maqsatym – aýyldan shyqqan jastarǵa júıeli túrde qoldaý kórsetý, aýyl men qala turǵyndarynyń óz qabiletterin iske asyrýdaǵy múmkindikterin teńestirýge kúsh salý», - dedi kandıdat.

Aqmola oblysynyń fermeri Azamat Qabjanov ta týǵan ólkeniń ózekti máselelerin sheshýge nıetti. Jarqaıyń aýdanyna qarasty Kostychevo aýyldyq okrýginde óz bıznesin jolǵa qoıǵan ol 20-dan astam adamdy jumyspen qamtyp otyr. Sonymen qatar, aýylǵa kelip jumys istegisi keletin jas otbasylar úshin baspana jáne balalarǵa arnalǵan sport ortalyǵyn salý da josparynda bar.

«Jańa jumys oryndaryn ashý, aýyl jastaryna bıznes bastaýdy úıretý, aýyl sharýashylyǵy kásiporyndaryn mamandarmen qamtamasyz etý, sportty jáne salaýatty ómir saltyn dáripteý» –29 jastaǵy kásipker osyndaı máselelerdi kótermek.

Túrkistan oblysynan kelgen Jumagúl Kúzdenbaeva kópbalaly otbasylardyń máselesin kótermekshi. Otyrar aýdanynyń Sháýildir aýylynda turatyn kópbalaly ana «Bıznes bastaý» baǵdarlamasy boıynsha grant jeńip alyp, sulýlyq salonyn ashty. Búginde ol 7 adamdy jumyspen qamtyp etip otyr.

«Úlken josparlarym bar. Praımerızden ótip, depýtat bolsam kópbalaly analardyń quqyǵyn qorǵap, olarǵa qoldan kelgenshe jaǵdaı jasaǵym keledi. Óz zamandastarymnyń, ardaqty analardyń problemalaryn jaqsy bilemin», - dedi ol.

Eske sala keteıik, «Nur Otan» praımerızine kandıdattardy usyný jáne tirkeý 28 tamyzda aıaqtalady. Oǵan qatysý úshin ótinishti https://primaries.kz/ saıtynda «Praımerız» aqparattyq júıesi arqyly onlaın joldaýǵa nemese aýmaqtyq uıymdastyrý komıtetterine jeke ótinish berýge bolady.

Partııa qundylyqtaryn ustanatyn jáne saılaý quqyǵy bar kez kelgen azamat úmitker bola alady. Ol úshin praımerızge qatysýshylardy tirkeý merzimi aıaqtalǵanǵa deıin «Nur Otan»-nyń qataryna qosylý kerek.

Praımerız ótkizý máseleleri boıynsha arnaıy 8 [phone] jedel jeli iske qosyldy.