9 mlrd teńgeniń zańsyz elektr saýdasy: ShQO-da maınıngke qatysty is tergelýde

ÓSKEMEN. KAZINFORM – Qarjy monıtorıngi agenttiginiń Shyǵys Qazaqstan oblysy boıynsha departamenti UQK departamentimen birlesip, jalpy somasy 9 mlrd teńgeden asatyn elektr energııasyn zańsyz satý deregin anyqtady.

Qoldanystaǵy zańnamaǵa sáıkes, maınıng kásiporyndaryna elektr energııasyn satý tek biryńǵaı memlekettik satyp alýshy arqyly jáne 1 megavatt-saǵattan aspaıtyn kólemde ǵana júzege asyrylýy tıis.

- Alaıda birqatar energııamen jabdyqtaýshy kompanııalar eki jyl boıy halyqqa, áleýmettik nysandar men strategııalyq mańyzy bar kásiporyndarǵa arnalǵan elektr energııasymen maınıng kásiporyndaryn zańsyz qamtamasyz etip kelgen, - dep jazylǵan derekte.

Jalpy qoldy bolǵan elektr energııasynyń kólemi 50 megavatt-saǵattan asqan. Bul – 50–70 myń halqy bar qalanyń energııa tutynýyna teń kórsetkish.

Tergeý barysynda qylmystyq jolmen alynǵan tabysqa uıymdastyrýshynyń elordadan 2 páter jáne 4 avtokólik satyp alǵany anyqtaldy. Olar sot sanktsııasymen múmkin bolatyn tárkileý maqsatynda buǵattaldy.

Tergep-tekserý jalǵasýda. QR QPK-niń 201-babyna sáıkes ózge aqparat jarııa etilmeıdi.

Aıta keteıik, buǵan deıin Qazaqstanda maınıngpen aınalysatyndar qalaı jumys isteıtinin habarlaǵanbyz.