9 mlrd teńgeden astam qarjyny qolma-qol aqshaǵa aınaldyrmaq bolǵan 59 qylmysker ustaldy
ASTANA. QazAqparat - 9 mlrd. teńgeden astam qarjyny qolma-qol aqshaǵa aınaldyrmaq bolǵan 59 qylmysker ustaldy. Bul týraly búgin QR Qarjy mınıstrligine qarasty Memlekettik kirister komıtetiniń Aldyn alý jumystary jáne baqylaý basqarmasy basshysynyń orynbasary Abzal Baımanov málim etti.
«Máselen, Qaraǵandy oblysynda azamat D-nyń jetekshiligimen aldyn ala sóz baılasqan toptyń jalǵan kásipkerlikpen aınalysýy faktisi boıynsha qylmystyq is tergelýde. Olar JShS-lardyń biriniń esepshotynan 423 mln. teńgeni qolma-qol aqshaǵa almastyrý barysynda ustaldy. Qazirgi ýaqytta bul qylmystyq is tergelýde», - dedi ol.
Onyń málimetterine sáıkes, ótken jyldyń 12 aıynda ekonomıkalyq tergeý qyzmetimen elimiz boıynsha 3 myńǵa jýyq jalǵan kásipkerlikke qatysty sot aldyndaǵy tekserý jumystary bastalǵan. Tekserý barysynda 2 myńnan astam jalǵan kásipkerlik esepten alynyp, 503 zańdy tulǵanyń tirkelýi zańsyz dep tanylǵan.
«Jedel aqparattarǵa sáıkes, Memlekettik kirister komıtetiniń qyzmetkerleri 9 mlrd. teńgeden astam qarjyny jalǵan shot-faktýralar arqyly qolma-qol aqshaǵa aınaldyrmaq bolǵan 59 qylmyskerdi ustady. Bul baǵyttaǵy jumystar jalǵasa beredi. Buǵan qosa, salyqtan jaltarýdyń jańa baǵyttaryn anyqtaýmen baılanysty qylmystyq isterge monıtorıng júrgizý jalǵasady», - dedi A.Baımanov.
