9 mlrd teńge alǵan: Mańǵystaý oblysynda halyqty qanaǵan qarjy pıramıdasy anyqtaldy
ASTANA. KAZINFORM – QMA Mańǵystaý oblysy boıynsha departamenti «Sax Invest» qarjy pıramıdasynyń qurylymdyq bólimshesin basqarǵan uıymdasqan qylmystyq topqa qatysty tergeý júrgizip jatyr.
Buǵan deıin habarlanǵandaı, kompanııa ózin ınvestıtsııalyq qor, baǵaly qaǵazdar, qarjy quraldary men basqa da aktıvterdiń ıesi, sondaı-aq Afrıkada almaz óndirý boıynsha jahandyq halyqaralyq jobanyń qatysýshysy retinde tanystyrǵan. Nátıjesinde uıymdastyrýshylar myńnan astam salymshydan zańsyz túrde 9 mlrd teńgeden astam qarajat tartqan.
Qarjylyq monıtorıng agenttigi málimetinshe, tergeý barysynda bul qarajattyń kóp bóligi kompanııa shotyna emes, pıramıdanyń uıymdastyrýshysy Mendyǵalıevtiń jeke shotyna aýdarylǵany anyqtaldy.
Keıin bul qarajat onyń tarapynan jeke maqsattarǵa: onyń ishinde kazınoǵa 2 mlrd teńge, «Blaısıko» atty baqylaýyndaǵy kompanııanyń úlesin satyp alýǵa 28 mln teńge, Atyraý qalasyndaǵy eki páterge 70 mln teńge, jeke úı qurylysyna 120 mln teńge, shetelde demalýǵa 377 mln teńge, qyzynyń Londonda oqýyna 53 mln teńge jumsalǵan.
Qylmystyq jaýapkershilikten jaltarý maqsatynda 2023 jyldyń basynda Mendyǵalıev 143 salymshymen jalpy 1,2 mlrd teńgeden astam zalaldy óteýge qatysty medıatıvtik kelisimder jasaǵan. Sondaı-aq, ol 2023 jyldyń sońyna deıin 7 mlrd teńge somasynda 1000-nan astam salymshyǵa qarajatty qaıtaramyn degen kepildik mindettemelerin bergen. Alaıda bul ýádesine qaramastan, salymshylarǵa aqshalaryn qaıtarmaǵan. 2024 jyldyń qarashasynda Mendyǵalıevke halyqaralyq izdeý jarııalandy.
Sot sanktsııasymen kúdiktilerge tıesili jalpy quny 600 mln teńge bolatyn múlikke tyıym salyndy. Onyń
ishinde: 4 páter, 2 jeke úı, 2 avtokólik, 10 myń USDT kólemindegi tsıfrlyq aktıvter, sondaı-aq «ForteBank» pen «Qazaqstan Halyq Banki» AQ-nyń baǵaly qaǵazdary bar.
Kúdikti retinde Astana, Aqtóbe, Oral jáne Aqtaý qalalaryndaǵy qarjy pıramıdasynyń qurylymdyq bólimshelerin basqarǵan 10 adam tanyldy.
Olardyń 7-eýine qamaýǵa alý túrindegi bultartpaý sharasy qoldanyldy.
Aıta keteıik, Abaı oblysynda qarjy pıramıdasyn uıymdastyrǵan eki azamat sottaldy.