9 mln teńge para alǵan Astana-Zelenstroı dırektory kinásin moıyndady

ASTANA. QazAqparat – Para aldy dep kúdikke ilingen «Astana-Zelenstroı» JShS bas dırektory A. Naýryzálige qatysty qylmystyq isti tergeý aıaqtaldy. Bul týraly QazAqparat Sybaılas jemqorlyqqa qarsy qyzmetine silteme jasap habarlaıdy.

«Naýryzáli bıyl 2 qyrkúıekte «Tabıǵat NS Servıs» JShS dırektory S. Karlovadan Astana qalasynyń Almaty jáne Esil aýdandaryn kógaldandyrý boıynsha Memlekettik satyp alý týraly sharttar boıynsha oryndalǵan jumystar aktilerine kedergisiz qol qoıǵany úshin 9 mln teńge somasynda aqshalaı qarajat aldy dep kúdikke ilingen.

Naýryzálige taǵylǵan aıyptar arnaýly jedel izdestirý is-sharasy, jasyryn tergeý áreketteriniń materıaldarymen, kýágerlerdiń aıǵaqtarymen jáne t. b. rastalady», - delingen habarlamada
A. Naýryzáli kinásin tolyq moıyndaǵan. Oǵan qatysty qorytyndy sheshimdi sot qabyldaıdy.