9 myńdaı adamǵa bıznes bastaý úshin grant berildi

ASTANA. KAZINFORM – 2025 jyldyń basynan bastap halyqtyń áleýmettik osal toptaryna jatatyn azamattarǵa jańa bıznes-ıdeıalardy iske asyrý úshin 8 964 grant, onyń ishinde aýyl turǵyndaryna – 5 539 grant berildi. Bıyl jalpy 9 234 grant berý josparlanǵan.

Úmitkerlerden barlyǵy 22,7 myńnan astam ótinish, onyń ishinde kópbalaly otbasylardan – 14,8 myń, múgedektigi bar adamdardan – 3,6 myń, múgedektigi bar balaǵa kútim jasaıtyn adamdardan – 2,6 myń, ataýly áleýmettik kómek alýshylardan – 600 ótinish qabyldandy. Sondaı-aq asyraýshysynan aıyrylǵan adamdar qatarynan 758 adam, 178 qonys aýdarýshy jáne 145 qandas ótinish berdi.

Ótinimderdiń eń kóp sany Túrkistan (1 788), Qyzylorda (1 500), Jambyl oblystary (1 006), al eń az sany Astana (126) men Ulytaý oblysynan (79) kelip túsken.

2025 jylǵy 1 qazandaǵy jaǵdaı boıynsha tehnologııalyq jabdyqtardy satyp alýǵa – 3 930, qural-saıman, eńbek quraldaryn satyp alýǵa – 2 589, mal sharýashylyǵyna – 2 228, oryn jaıdy jalǵa alýǵa – 135, ósimdik sharýashylyǵyna – 82 qaıtarymsyz granttar berildi.

Alýshylardyń sanattary bólinisinde kópbalaly otbasylardyń múshelerine – 5 822, múgedektigi bar adamdarǵa – 1 397, múgedektigi bar balalardy tárbıelep otyrǵan ata-analarǵa – 1 015, ataýly áleýmettik kómek alýshylarǵa – 266, asyraýshysynan aıyrylý boıynsha tólem alýshylarǵa – 312, qonys aýdarýshylarǵa – 87 jáne qandastarǵa – 65 grant berildi.

Bıyl granttar alýǵa ótinishterdi qabyldaý 2 lek boıynsha ótkizildi: birinshisinde – 4 207, ekinshisinde – 4 757 grant. Sonymen qatar 20 qazanda birinshi jáne ekinshi lekterden únemdelgen qarajat esebinen taǵy qosymsha lek bastaldy.

Barlyǵy únemdelgen qarajat esebinen elimizdiń 9 óńirinde 270 grant berý josparlanyp otyr. Onyń ishinde: Abaı (2 aýdanda – 4), Aqmola (14 aýdanda – 40), Shyǵys Qazaqstan (2 aýdanda - 9), Pavlodar (6 aýdanda – 40), Qyzylorda (Qyzylorda qalasynda – 56), Túrkistan (Jetisaı aýdanynda – 5), Soltústik Qazaqstan (4 aýdanda – 9), Ulytaý (4 aýdanda – 11) jáne Shymkent qalasy (96).

Esterińizge sala keteıik, granttardy eńbek mobıldiligi ortalyqtary úmitkerlerdiń ótinishterin qaraý jónindegi aýdandyq/qalalyq komıssııanyń sheshimi negizinde beredi.

Úmitkerler ózderiniń bıznes-jobalaryn komıssııa otyrystarynda tanystyrady. Komıssııa otyrysynyń ótkiziletin orny, kúni men ýaqyty týraly habarlama Business.enbek.kz portalynda grant alýǵa ótinish berýshiniń jeke kabınetinde kórsetiledi.

Bul rette, komıssııanyń árbir múshesi bıznes-jospardy baǵalaıdy jáne baǵalaý paraǵyn mynadaı krıterııler boıynsha toltyrady: bıznes-ıdeıanyń básekege qabilettiligi, ótkizý naryqtarynyń pysyqtalýy, bıznes-jobanyń qarjylyq ómirsheńdigi, kásipkerlik daǵdylardyń deńgeıi, jańa jumys oryndaryn qurý.

Osylaısha, grant berý týraly sheshim komıssııalyq jáne úmitkerlerdiń bıznes-jobalarynyń pysyqtalýyn baǵalaýdyń naqty krıterııleri negizinde qabyldanady.

Komıssııanyń sheshimi týraly aqparat úmitkerdiń Business.enbek.kz portalyndaǵy jeke kabınetine jiberiledi. Komıssııa oń sheshim qabyldaǵan jaǵdaıda úmitker salyq organdarynda óz qyzmetin tirkeıdi, banktik derektemelerdi usynady, shartqa qol qoıady jáne odan ári toqsan saıyn bólingen qarajattyń paıdalanylýy týraly esepterdi usynady. Munyń bári eńbek mobıldiligi ortalyqtaryna barmaı-aq, elektrondyq formatta jasalady.

Kelesi jyly da 9 myń grant berý kózdelgen.