9-Mamyr - Jeńis kúni Astanadaǵy «Qazaq eli» monýmentinen «Otan qorǵaýshylar» eskertkishine deıin azamattyq sherý ótedi - ákimdik
ASTANA. Mamyrdyń 4-i. QazAqparat /Gúlmıra Álıakparova/ - Astana qalasynyń ákimdigi 9-Mamyr - Jeńis kúni «Qazaq eli» monýmentinen bastap «Otan qorǵaýshylar» eskertkishine deıin azamattyq sherý ótetinin habarlap, qatysýshylardy «Georgıı lentasyn» bir adamdaı taǵýǵa shaqyrdy.
Búginde «Georgıı lentasy» Dańq Ordeni ıegerleriniń erekshe belgisi ǵana emes, keńes halqynyń 1941-1945 jyldardaǵy soǵystaǵy Uly Jeńisiniń nyshany ispetti.
Jeńistiń 65 jyldyǵyn merekeleý qarsańynda sarǵylt-qara tústi jibek qıyndysyn Astana qalasynyń turǵyndary men qonaqtary da ala alady. «Georgıı lentasy» men estelik belgiler, mamyrdyń 9-y kúni teńerteńgi saǵat 9.00-de «Qazaq eli» monýmentinen bastaý alyp, «Otan qorǵaýshylar» eskertkishiniń Máńgilik alaýyna deıin ótetin sherýdiń barysynda taratylatyn bolady.
Sondaı-aq, «Georgıı lentalary» mamyrdyń 8-i kúni Astana qalasy ákimdigi ǵımaratynyń aldyndaǵy alańda (Abaı jáne Beıbitshilik kósheleriniń qıylysy) da taratylmaq. Elorda ákimdigi bul ıgi sharaǵa qatysýǵa eriktilerdi shaqyryp otyr. Olarǵa sondaı-aq, azamattyq sherýdiń sharttaryn aqparattandyrý máselesi de senip tapsyrylatyn bolady.
Eske sala keteıik, «Georgıı lentasyn» taratý dástúri Jeńistiń 60 jyldyǵy qarsańynda reseılik «RIA-jańalyqtar» aqparattyq agenttiginiń jáne stýdentter qozǵalysynyń bastamasymen bastalǵan bolatyn.
