9 mamyrǵa oraı ardagerlerge jergilikti bıýdjetterden birjolǵy áleýmettik kómek tólendi
ASTANA. KAZINFORM – Soǵys ardagerlerine 9 mamyrǵa oraı jergilikti bıýdjetter esebinen birjolǵy aqshalaı tólemder berildi.
Búgingi tańda Qazaqstannyń barlyq óńiri men Astana, Almaty jáne Shymkent qalalarynda ardagerlerge tólem jasaldy. Atalǵan maqsattarǵa jergilikti bıýdjetterden barlyǵy 187 mln teńge bólindi.
Áleýmettik kómek kórsetýdiń qoldanystaǵy qaǵıdalaryna sáıkes 9 mamyrǵa oraı beriletin birjolǵy tólemder somasy jergilikti bıýdjetterdiń múmkindikterine jáne máslıhattardyń sheshimderine baılanysty ár oblysta derbes belgilenedi.
QR Eńbek jáne halyqty áleýmettik qorǵaý mınıstrliginiń usynysy boıynsha sońǵy jyldary kóptegen oblysta ardagerlerge tólemder biryńǵaı mólsherde tólenedi.
Máselen, bıyl respýblıka boıynsha birjolǵy áleýmettik kómektiń ortasha mólsheri 1,5 mln teńgeni qurady. Bul rette kóptegen óńirlerde ortasha mólsherden joǵary soma tólendi: Aqmola oblysynda – 3 mln teńge, Aqtóbe oblysynda – 2 mln teńgeden astam. Abaı, Almaty, Qaraǵandy, Pavlodar oblystary men Astana jáne Almaty qalalarynda UOS qatysýshylary 2 mln teńgeden aldy.
Búginde respýblıkada Ekinshi dúnıejúzilik soǵystyń 148 ardageri turady. Olarǵa áleýmettik qoldaýdyń basqa da túrlerine qaramastan aı saıyn 16 AEK (2024 jyly 59 072 teńge) mólsherinde arnaýly memlekettik járdemaqy tólenedi.