9 qarashadan úsh avtojolda ortasha jyldamdyq baqylanady
ASTANA. KAZINFORM — 9 qarashadan bastap respýblıkalyq avtojoldarda ortasha jyldamdyqty baqylaıtyn jańa aımaqtar iske qosylady.
2026 jylǵy 9 qarashadan bastap Almaty — Qorǵas, Qaraǵandy — Burylbaıtal jáne Qyzylorda — Aral avtojoldarynda kólikterdiń ortasha jyldamdyǵy baqylanady.
«QazAvtoJol» UK» AQ málimetinshe, respýblıkalyq mańyzy bar úsh avtojolda ortasha jyldamdyqty baqylaıtyn alty aımaq iske qosylady.
Baqylaý engiziletin baǵyttar:
1. Almaty — Qorǵas (jańartyldy)
Uıǵyr — Panfılov aımaǵy — 50+832 km, ruqsat etilgen jyldamdyq — 120 km/saǵ.
2. Qaraǵandy — Burylbaıtal
Shubartúbek — Gúlshat aımaǵy — 42+158 km, ruqsat etilgen jyldamdyq — 140 km/saǵ.
Gúlshat — Tasaral aımaǵy — 42+550 km, ruqsat etilgen jyldamdyq — 140 km/saǵ.
3. Qyzylorda — Aral
Aqjarma — Aqjar aımaǵy — 48+239 km, ruqsat etilgen jyldamdyq — 100 km/saǵ.
Aqjar — 103-razezd aımaǵy — 122+421 km, ruqsat etilgen jyldamdyq — 100 km/saǵ.
103-razezd — Áıteke bı aımaǵy — 95+871 km, ruqsat etilgen jyldamdyq — 100 km/saǵ.
Júıeniń basty ereksheligi — kólik jyldamdyǵy tek kamera ornatylǵan jerde emes, búkil baqylaý aımaǵynda esepteledi.
— Arnaıy qurylǵylar kóliktiń baqylaý aımaǵyna kirgen jáne odan shyqqan ýaqytyn tirkeıdi. Osy málimetter negizinde júrip ótken qashyqtyq pen jumsalǵan ýaqyt esepke alynyp, ortasha jyldamdyq avtomatty túrde anyqtalady. Eger júrgizýshi belgilengen jyldamdyq sheginen assa, quqyqbuzýshylyq týraly málimet tıisti ýákiletti organdarǵa joldanady, — delingen habarlamada.
Jańa baqylaý aımaqtaryn engizýdegi basty maqsat — jol-kólik oqıǵalarynyń aldyn alý, qozǵalys qaýipsizdigin arttyrý jáne júrgizýshilerdiń jol erejelerin saqtaýyna yqpal etý.
Aıta ketelik elde júk kólikteriniń jol aqysy ózgerýi múmkin ekenin jazǵan edik.
