9 qarasha. Kazinform kúntizbesi. Tulǵalar týǵan kún
Búgin, 9 qarasha kúni tulǵalardan kimder dúnıege kelgen? Kazinform oqyrmandaryna esimder kúntizbesin usynady.
Ońalsyn JUMABEKOV, Qazaqstan Respýblıkasynyń memleket qaıratkeri
1948 jyly Almaty oblysynda dúnıege kelgen. 1974 jyly S.M.Kırov atyndaǵy Qazaq memlekettik ýnıversıtetin zańger mamandyǵy boıynsha bitirgen.
Eńbek joly: 1966–1969 jyldary Taldyqorǵan oblysy Aqsý aýdanyndaǵy «Jańaqoǵam» keńsharynda jumysshy bolyp eńbek etti. 1974–1980 jyldary Áýezov aýdany prokýratýrasynda taǵylymdamadan ótip, keıin tergeýshi qyzmetin atqardy. 1980 jyly Qazaq KSR prokýratýrasynyń tergeý basqarmasynyń prokýrory boldy. 1980–1983 jyldary Qazaq KSR prokýrorynyń erekshe tapsyrmalar jónindegi kómekshisi qyzmetin atqardy. 1983–1985 jyldary Almaty qalasy prokýratýrasynyń Frýnze aýdanynyń prokýrory, al 1985–1990 jyldary Almaty oblysy prokýrorynyń orynbasary boldy. 1990–1994 jyldary Mańǵystaý oblysynyń prokýrory, 1994–1996 jyldary Almaty oblysynyń prokýrory qyzmetin atqardy. 1997–2003 jyldary Qazaqstan Respýblıkasy Bas prokýrorynyń orynbasary, 2003–2005 jyldary Qazaqstan Respýblıkasynyń Ádilet mınıstri boldy. 2005–2007 jyldary Qazaqstan Respýblıkasy Ortalyq saılaý komıssııasynyń tóraǵasy, 2007–2008 jyldary Qazaqstan Respýblıkasy Prezıdenti Ákimshiligi Basshysynyń orynbasary qyzmetin atqardy. 2008–2012 jyldary Qazaqstan Respýblıkasynyń Joǵary Sot Keńesiniń tóraǵasy boldy. 2012–2016 jyldary Qazaqstan Respýblıkasy Parlamenti Májilisiniń V shaqyrylym depýtaty, Zańnama jáne sot-quqyqtyq reforma komıtetiniń múshesi qyzmetin atqardy.
Murat MAIKEEV, «Arystan» mamandandyrylǵan lıtseıiniń bastyǵy
1959 jyly Aqtóbe qalasynda dúnıege kelgen. 1980 jyly Almaty joǵary jalpyáskerı komandalyq ýchılışesin, 1994 jyly M.V.Frýnze atyndaǵy Áskerı akademııany, 2014 jyly Belarýs Respýblıkasy Áskerı akademııasynyń Bas shtab fakýltetin bitirgen.
Eńbek joly: 1983–1987 jyldary motoatqyshtar rotasynyń komandıri boldy. 1987–1991 jyldary motoatqyshtar batalony shtabynyń bastyǵy ári komandırdiń orynbasary, keıin batalon komandıri qyzmetterin atqardy. 1994–1998 jyldary Qazaqstan Respýblıkasy Respýblıkalyq ulanynyń batalon komandıri, brıgada komandıriniń orynbasary jáne polk komandıri boldy. 1998–2002 jyldary motoatqyshtar dıvızııasy komandıriniń orynbasary, keıin dıvızııa komandıri qyzmetin atqardy. 2002 jylǵy naýryzdan 2003 jylǵy qyrkúıekke deıin Qazaqstan Respýblıkasy Qorǵanys mınıstrliginiń tárbıe jáne áleýmettik-quqyqtyq jumystar departamentiniń bastyǵy boldy. 2003 jylǵy qyrkúıekten 2009 jylǵy tamyzǵa deıin Qazaqstan Respýblıkasy Qarýly Kúshteriniń Aeroutqyr áskerlerin basqardy. 2009-2010 jyldary QM Shtab bastyqtary komıteti tóraǵasynyń orynbasary, 2010-2016 jyldary QR QK Qurlyq áskerleriniń bas qolbasshysy boldy. 2016 jylǵy qyrkúıekten 2019 jylǵy sáýirge deıin Qazaqstan Respýblıkasy Qorǵanys mınıstriniń birinshi orynbasary – Qarýly Kúshter Bas shtabynyń bastyǵy qyzmetin atqardy.
Qazirgi qyzmetin 2022 jylǵy qazannan beri atqaryp keledi.
III dárejeli «KSRO Qarýly Kúshterindegi Otanǵa sińirgen eńbegi úshin», II dárejeli «Aıbyn» (2001), II dárejeli «Dańq» (2012) ordenderimen marapattalǵan.
Aıman AIMAǴAMBET, qazaq teatr jáne kıno aktrısasy, Qazaqstannyń eńbek sińirgen qaıratkeri
1959 jyly Qaraǵandy oblysynda dúnıege kelgen. J.Jabaev atyndaǵy orta mektepti, 1984 jyly Almatydaǵy P.I.Chaıkovskıı atyndaǵy mýzyka ýchılışesiniń án aıtý jáne dırıjerlik fakýltetin, 1989 jyly Almaty qalasyndaǵy T.Júrgenov atyndaǵy teatr-kórkemóner ınstıtýtynyń «Mýzykalyq-drama teatry jáne kıno akteri» fakýltetin bitirgen.
Eńbek joly: 1978–1980 jyldary Jezqazǵan oblystyq fılarmonııasynyń «Jezkik» ansamblinde ánshi boldy. 1989–1991 jyldary Jezqazǵan mýzykalyq-drama teatrynda aktrısa qyzmetin atqardy. 1991 jyldan bastap Qalıbek Qýanyshbaev atyndaǵy Memlekettik akademııalyq qazaq mýzykalyq-drama teatrynda aktrısa bolyp qyzmet etti. 2005 jyly XIII Respýblıkalyq teatr festıvalinde «Eń úzdik áıel beınesi» nomınatsııasy boıynsha «Úzilgen besik jyry» spektaklindegi Ana rólin somdaǵany úshin jeńimpaz atandy. 2016 jyly Qazaqstan drama teatrlarynyń XXIV respýblıkalyq festıvalinde A. Chehovtyń «Shıe baǵy» komedııasyndaǵy Sharlotta róli úshin «Úzdik spektakl» nomınatsııasy boıynsha marapatqa ıe boldy. 2017 jyly Reseıdiń Chelıabi qalasynda ótken V Halyqaralyq shaǵyn formattaǵy teatrlar festıvalinde jáne Tatarstan Respýblıkasynyń Qazan qalasynda uıymdastyrylǵan XIII Túrki halyqtarynyń «Naýryz» halyqaralyq teatr festıvalinde jeńiske jetti.
Qaharman ORAZALIN, Aqtóbe oblysy Tótenshe jaǵdaılar departamentiniń bastyǵy
1978 jyly Shyǵys Qazaqstan oblysy Tarbaǵataı aýdanynyń Aqsýat aýylynda dúnıege kelgen. 2000 jyly Shákárim atyndaǵy Semeı memlekettik ýnıversıtetin, 2011 jyly Reseı Tótenshe jaǵdaılar mınıstrliginiń Azamattyq qorǵaý akademııasyn bitirgen.
Eńbek joly: 2000–2020 jyldary azamattyq qorǵanys bólimsheleriniń aǵa ofıtseri, Shyǵys Qazaqstan oblysy Tótenshe jaǵdaılar departamentiniń áskerı jumyldyrý jáne arnaıy jumys bóliminiń bastyǵy, Astana qalasy Tótenshe jaǵdaılar departamenti Azamattyq qorǵanys basqarmasy bastyǵynyń orynbasary qyzmetterin atqardy. 2020–2024 jyldary Qazaqstan Respýblıkasy Tótenshe jaǵdaılar mınıstrliginiń Tótenshe jaǵdaılardy joıý departamentiniń bastyǵy boldy.
Qazirgi qyzmetin 2024 jylǵy qyrkúıekten beri atqaryp keledi.
