9 qabatty turǵyn úıden shyqqan órtti sóndirý barysynda órt sóndirý bóliminiń 3 mamany zardap shekti
ASTANA. Shildeniń 15-i. QazAqparat - Pavlodar oblysynyń Ekibastuz qalasynda 9 qabatty turǵyn úıden shyqqan qyzyl jalynnyń aldyn alý barysynda órt sóndirý qyzmetiniń 3 mamany zardap shekti,
dep habarlady QR Tótenshe jaǵdaılar mınıstrliginiń baspasóz qyzmetinen.
Vedomstvonyń málimetinshe, kúıik shalǵan aǵa leıtenant medıtsınalyq kómek kórsetilgennen keıin úıine jiberilgen. Al 2 kishi serjant aýrýhananyń reanımatsııalyq bólimine jetkizilgen.
Órt shildeniń 14-i kúni saǵat 15:30-da 9 qabatty turǵyn úı páterleriniń birinde oryn alǵan. Qyzyl jalyn 80 sharshy metr aýmaqty sharpyǵan. Tótenshe jaǵdaı kezinde 27 adam qaýipsiz jerge kóshirilgen.
Qyzyl jalyndy aýyzdyqtaýǵa QR TJM Pavlodar oblystyq tótenshe jaǵdaılar departamenti órt sóndirý qyzmetiniń jeke quramyndaǵy 19 maman men 5 tehnıka jumyldyryldy.
