9 eldiń oıynshylary toǵyzqumalaqtan ózara myqtyny anyqtaıdy
NUR-SULTAN. QazAqparat - Qyzylorda qalasynda memleket jáne qoǵam qaıratkeri Nálqoja Ergeshbaevty eske alýǵa arnalǵan toǵyzqumalaqtan ashyq Azııa kýbogy bastaldy, dep habarlaıdy QazAqparat tilshisi.
Dúnıejúzilik toǵyzqumalaq federatsııasynan málim etkendeı, jarystyń saltanatty ashylýyna qala əkimi Nurlybek Nəlibaev, Dúnıejúzilik toǵyzqumalaq federatsııasynyń vıtse-prezıdenti Maqsat Shotaev jəne oblystyq toǵyzqumalaq federatsııasynyń prezıdenti Ábdiqadyr Ergeshbaev qatysyp, oıynshylarǵa sáttilik tiledi.
Sondaı-aq shara aıasynda Mońǵolııa memleketiniń toǵyzqumalaq qaýymdastyǵynyń basshysy Doldaı Erbol oblystyq toǵyzqumalaq federatsııasynyń prezıdenti Ábdiqadyr Ergeshbaevqa «Qurmet ordenin» tabystady.
Dúbirli básekede 9 elden, ıaǵnı Qazaqstan, Aýǵanstan, Ázerbaıjan, Qyrǵyzstan, Túrikmenstan, Ózbekstan, Túrkııa, Reseı jáne Mońǵolııadan 262 toǵyzqumalaqshy ózara myqtyny anyqtamaq.
Jarys klassıka men blıts boıynsha 9 týrda, 17 jasqa deıingi jastar jáne odan joǵary jastaǵy erler men əıelder arasynda 4 topta ótkiziledi.
Jeńimpazdar men júldegerler 6 naýryz kúni belgili bolady.
