9 balyq zaýytyna qarsy negizsiz qylmystyq is qozǵaldy – depýtat

ASTANA. KAZINFORM – Qarjylyq monıtorıng agenttigi 9 balyq zaýytynyń býhgalterııa, is-júrgizý qujattaryn tárkilegen. Qazir zaýyttar jumysyn toqtatqan. Balyqshylardyń muńyn búgin Májilis depýtaty Erlan Saırov kóterdi. 

«Qarjylyq monıtorıng agenttigi Memleket basshysynyń tikeleı tapsyrmasy bola tura, Qazaqstannyń balyq sharýashylyǵyna shabýyl jasap jatyr. 2023 jyldyń qazan aıynan bastap, Shyǵys Qazaqstan, Almaty, Túrkistan jáne Atyraý oblysynda balyq ónimderin óńdeıtin 9 zaýytqa qarsy negizsiz qylmystyq ister qozǵalǵan. Barlyq zaýyt balyq ónimderin eksportqa shyǵarady. Esep-qısaby ashyq, shyqqan ónim keden arqyly baqylanyp otyrady. Elimizde 1 300-ge jýyq balyq sharýashylyǵy sýbektisi bar, salada jáne enshiles kásiporyndarda 500 myńǵa jýyq adam jumys isteıdi», - dedi Erlan Saırov depýtattyq saýal joldaı otyryp.

Halyq qalaýlysy keltirgen málimetke súıensek, otandyq balyqshylar EO, Qytaı, TMD elderine, Taıaý Shyǵys elderine, jalpy sany 36 memleketke balyq ónimderin eksporttaıdy. Ótken jyldary shortan, sazan, sýdak sekildi 30-myń tonnaǵa jýyq balyq ónimi shetelge satylǵan. 

«Elimizdiń ishki jalpy ónimin eksporttyq taýarlarmen toltyryp otyrǵan ekonomıka salasynyń kásiporyndaryna Qarjylyq monıtorıng agenttigi salyq tóleýden jaltyrdy degen eki udaıy aıyppen qylmystyq is qozǵaǵan. Memleketke salyq tólep, myńdaǵan azamatty jumyspen qamtyp otyrǵan 9 balyq zaýytynyń búkil býhgalterııa, is-júrgizý qujattary tárkilengen, zaýyttar jumysyn toqtatqan. Qarjy monıtorıngi agenttiginiń áreketteri elimizdiń eksporttyq áleýetin arttyryp otyrǵan ekonomıka salasynyń jumysyn tolyq toqtatýǵa alyp kelýi múmkin. Qazynaǵa túsetin salyq toqtap, balyq ónerkásibi, enshiles kásiporyndarda isteıtin myńdaǵan azamattyń jalaqysynyń tólenbeı, zaýyttardyń ózderine shet elden ónimdi ýaqytynda jetkizbegeni úshin aıyppul sanktsııalary qaýpi tónip tur», - deıdi ol.

Odan ári depýtat balyqshylardy qylmystyq qýdalaý toqtatylǵan joq, ıaǵnı, memleketke ekonomıkalyq zııan kúnnen-kúnge artyp bara jatyr deı kele, negizsiz tekserýlerdi toqtatý kerek dep otyr. 

Osy oraıda Erlan Saırov máseleniń sheshý joldaryn usyndy: 

1. Bas prokýratýra Qarjylyq monıtorıng agenttiginiń balyq zaýyttaryn tekserýleriniń zańdylyǵyn anyqtaýy qajet jáne qylmystyq istiń ashyqtyǵyn qamtamasyz etýi tıis.

2. Qarjylyq monıtorıng agenttiginiń ashqan qylmystyq isterine tez arada qajetti quqyqtyq baǵa berip, qarastyrylyp otyrǵan isterdi zań aıasynda ádiletti toqtatýdy qajet. 

3. Bas Prokýratýra quqyq qorǵaý organdarynyń ekonomıka sýbektilerine jón-josyqsyz sheńgel qoldaryn soza berýin toqtatýy tıis.

4. Bas Prokýratýra Prezıdent Qasym-Jomart Toqaevtyń quqyq qorǵaý organdarǵa otandyq bıznesti kúshteýdi toqtatý jónindegi tapsyrmasyn tolyq oryndalýyn qamtamassyz etý mańyzdy.