9 azamat saılaý ýchaskesinen keleńsiz minez-qulyǵy úshin shyǵaryldy - ІІM
Іshki ister mınıstrligi Ákimshilik polıtsııa komıtetiniń tóraǵasy Qaısar Sultanbaev Qazaqstan telearnasy ótkizip jatqan onlaın telemarafonda osyndaı málimet keltirdi, dep habarlaıdy QazAqparat tilshisi.
«Komıssııa tóraǵalarynyń aktileri boıynsha der kezinde sheshilgen eleýsiz oqıǵalar oryn alǵan. Keleńsiz minez-qulyqqa baılanysty saılaý ýchaskelerinen 9 azamat shyǵaryldy. Olar túrli sebepterge baılanysty. Polıtsııa qyzmetkerleriniń shtattyq rejımde qyzmeti jalǵasýda. El kólemindegi 506 jabyq saılaý ýchaskesiniń 322-sinde daýys berý aıaqtaldy. Jalpy elimizde saıası-qoǵamdyq ahýal turaqty», - dedi komıtet tóraǵasy.
Buǵan deıin Bas prokýratýra ókili úsh oblysta saılaý týraly zańnamany buzýdyń 9 faktisi resmı tirkelgenin habarlaǵan bolatyn.
Atalǵan zańsyzdyqtarǵa jol bergen saılaý komıssııasynyń músheleri sol boıda protsesten shettetilgen kórinedi.
«Atalǵan aýdandardaǵy saılaý ýchaskelerinde komıssııa músheleri daýys berýshilerdiń ótinishi boıynsha týystary úshin daýys berýge bıýlletender berilip, daýys berýdiń teń quqyqtylyq talaby buzylǵan. Ondaı bıýlleten bergen komıssııa músheleri birden ýchaskedegi jumystan shettetildi. Qazirgi tańda jergilikti prokýrorlar olardy Ákimshilik quqyq buzý týraly kodekstiń 110-baby boıynsha ákimshilik jaýapqa tartý baǵytynda sharalar qabyldap jatyr. Daýys berýdiń teńquqyqtylyq talabyn buzyp, ózge adam úshin daýys bergen kináliler Ákimshilik quqyq buzý týraly kodekstiń 110-baby boıynsha 108-baby boıynsha ákimshilik jazaǵa tartylady», - dedi Bas prokýratýra ókili.
