9 aıdaǵy respýblıkalyq bıýdjettiń shyǵyny qansha

NUR-SULTAN. QazAqparat – 9 aıda respýblıkalyq bıýdjetten shyǵystarǵa bólingen 11 trln teńgeniń 13 mlrd teńgesi ıgerilmegen, dep habarlaıdy QazAqparat tilshisi.

Úkimet otyrysynda QR Qarjy mınıstri Erulan Jamaýbaev osyndaı málimet keltirdi.

«Memlekettik bıýdjettiń shyǵystary 99,7%-ke, respýblıkalyq bıýdjettiń shyǵystary – 99,8%-ke, jergilikti bıýdjetterdiń shyǵystary 99,7%-ke atqaryldy.

Ótken jyldyń uqsas kezeńimen salystyrǵanda bıýdjetterdiń barlyq deńgeılerinde atqarylý protsenti joǵary. Respýblıkalyq bıýdjet boıynsha somasy 11 trln teńgege shyǵystar júrgizildi.

Bıýdjettiń oryndalmaýy 19 mlrd teńgeni qurady. Onyń ishinde 6 mlrd teńge únemdeýge jatady. Igerilmegeni - 13 mlrd teńge», - degen mınıstr ásirese Mádenıet jáne sport, Densaýlyq saqtaý, Ádilet, Tsıfrlyq damý, ınnovatsııalar jáne aeroǵarysh ónerkásibi mınıstrlikterinde shyǵystardy ıgerý kestesi keshigip jatqanyn aıtty.

Onyń sózinshe, ıgerilmeýdiń negizgi sebepterine tólem naqty kórsetilgen qyzmetter men oryndalǵan jumys aktileriniń, shot-faktýralardyń ýaqtyly usynylmaýy, qazynashylyq organdaryna tólem shottaryn kesh usynýy, sotta memleket múddesin qorǵaý jónindegi talap-aryz jumystaryn júrgizý sııaqty jaıttar sebep bolǵan.

Qarjy mınıstri jergilikti bıýdjetterdiń shyǵystaryna da toqtaldy.

«Aǵymdaǵy jyly óńirlerge 2,5 trln teńge somasynda nysanaly transfertter kózdelgen. 1 qazanda olarǵa 1 trln 525 mlrd teńge bólingen. Onyń 99,5%-i ıgerildi. Atqarylmaǵany – 7 mlrd teńge, onyń ishinde únemdelgeni – 3 mlrd teńge, ıgerilmegeni - 4 mlrd teńge.

Ásirese Túrkistan, Aqtóbe, Qyzylorda jáne Jambyl oblystarynda shyǵystardy ıgerý qarqyny tómen», - dedi Erulan Jamaýbaev.

Eske salsaq, t oǵyz aıda bıýdjetke 7,9 trln teńge tústi.