9 aıda jol apatynan 1700-den astam adam qaza tapqan
ASTANA. KAZINFORM — Statıstıka kórsetkendeı, aǵymdaǵy jylǵy 9 aıda elimizde 19 myńnan astam (19302) jol-kólik oqıǵasy tirkelgen, onyń saldarynan 26 703 adam zardap shekken. Bul týraly Quqyqtyq statıstıka jáne arnaıy esepke alý jónindegi komıtet málim etti.
Statıstıkaǵa súıensek, jol-kólik apaty saldarynan 1 754 adam qaza tapsa, onyń ishinde:
- 230 kámeletke tolmaǵan balalar;
- 486 áıelder;
- 1 268 er adamdar.
Jaraqat alǵandar sany - 24 949:
- 6 488 kámeletke tolmaǵan balalar;
- 10 937 áıelder;
- 14 012 er adamdar.
Aımaq boıynsha eń kóp jol apaty:
Almaty qalasy - 3 869, Almaty oblysy – 2 118
Astana qalasy -1 220, Jambyl oblysy – 1 181,
Shymkent qalasy –1 122 oblystarynda tirkelgen.
Kóp jaǵdaıda jol-kólik oqıǵasyna sebep bolǵan negizgi zań buzýshylyqtarǵa mynalar jatady:
- manevr jasaý qaǵıdalaryn saqtamaý – 3 700,
- jyldamdyqty asyrý – 2 773,
- jaıaý júrginshilerge qozǵalystaǵy basymdylyqty usynbaý – 3 401,
- jol qıylystarynan ótý nemese joldyń júrý bóligin qıyp ótý qaǵıdalaryn buzý -1 417.
Jol-kólik oqıǵasynyń 95% - dan astamy júrgizýshilerdiń kinásinen bolady, onyń 451-i alkogoldik nemese esirtkilik masań kúıinde jasalǵan.
Adam ólimine ákeletin JKO-nyń 60%-dan kóbi qala mańyndaǵy joldarda oryn alady.
Jalpy apattyq deńgeıdiń joǵarylaýyna júrgizýshilerdiń jyldamdyq rejımin asyrýy, basyp ozý qaǵıdalaryn saqtamaýy, sharshańqy kúıde jolǵa shyǵýy sebep bolatyny anyqtalǵan.
Sońǵy jyldary jastar men jasóspirimder moped, skýter, samokat syndy shaǵyn kólik quraldaryn tizgindeýdi sánge aınaldyrdy.
Jol qozǵalysyna qatysýshylardyń jetkilikti tájirıbesiniń joqtyǵynan, sondaı-aq erejelerdi bilmeýiniń saldarynan 1 077 JKO-na sebep bolyp otyr, onda 1190 adam jaralanyp, 86-sy qaza tapty.
Jol qaýipsizdigi deńgeıin arttyrý maqsatynda Komıtet janynan turaqty vedomstvoaralyq jumys toby quryldy.
Búgingi tańda, mysaly,Kólik mınıstrligine júktelgen apatty-qaýipti ýchaskelerdi anyqtaý tetigi iske qosyldy. Bul rette Komıtettiń JKO týraly derekteri negizge alynady.
Іshki ister mınıstrligi júrgizýshi emtıhandaryn tapsyrý úshin ózin-ózi daıyndaýdy alyp tastady.
Avtomektepterdi memlekettik baqylaý, gaz-ballon jabdyqtaryn ornatý jáne tehnıkalyq baıqaý operatorlarynyń jaýapkershiligin kúsheıtý máseleleri pysyqtalyp jatyr.
Vedomstvoaralyq jumys tobynyń bastamasymen Kólik mınıstrligi taksı agregatorlarymen memorandým jasady. Barlyq sharalar uzaq merzimdi perspektıvaǵa baǵyttalǵan.
Komıtet adamdar zardap shekken jol-kólik oqıǵalaryna qatysty memlekettik statıstıkany qalyptastyrady. Bul derekter «qamqor.gov.kz» portalynda Komıtet ázirlegen apat kartasynda qoljetimdi. Elimizdegi joldardyń apattyq jaǵdaıy týraly tolyq aqparatty osy portaldan bilýge bolady.