9 aıda memlekettik qyzmet kórsetý kezinde 85 myńnan astam zańbuzýshylyq anyqtaldy
ASTANA. KAZINFORM – Memlekettik qyzmet isteri agenttiginiń tóraǵasy Darhan Jazyqbaıdyń basshylyǵymen servıstik memlekettik apparatty qalyptastyrý jáne onyń qyzmetin bıýrokratııadan aryltý máseleleri boıynsha Konsýltatıvtik-saraptamalyq toptyń otyrysy ótti.
Іs-shara barysynda memlekettik kórsetiletin qyzmetterdiń sapasy, sonymen qatar jer qatynastary salasynda kórsetiletin qyzmetterdi ońtaılandyrý máseleleri qaraldy.
Agenttik tóraǵasy Darhan Jazyqbaı bıýrokratııa memlekettik apparat qyzmetiniń jumysyn qıyndatatyn jáne onyń tıimdiligin tómendetetin negizgi faktorlardyń biri ekendigine toqtala kele: «Memleket basshysy «Bıýrokratııa – barlyq reformalardyń sapasyz bolyp iske asýynyń basty sebebi» dep atap kórsetken bolatyn. Qujat rásimdeýdiń uzaqtyǵy, artyq qujat aınalymy, formaldylyq – azamattar men kásipkerlerge qıyndyq týǵyzady. Sondyqtan memlekettik kórsetiletin qyzmetterdi usynýda ashyqtyqqa, jedeldik pen sapaǵa mán berý qajet», - dedi.
Memleket basshysy 2022 jylǵy sáýirde memlekettik apparat qyzmetin bıýrokratııadan aryltý týraly Jarlyqqa qol qoıǵan sátten bastap agenttik bıýrokratııalyq kedergilerdi joıý boıynsha aýqymdy is-sharalar júrgizdi. 2 jyl ishinde memlekettik organdardyń 4 myńnan astam fýnktsııalary taldandy.
MQІA tóraǵasy Darhan Jazyqbaı memlekettik apparat qyzmetiniń tıimdiligin arttyrý úshin keshendi sharalar júzege asyrylyp jatqanyn atap ótti. Birinshiden, memlekettik organdardyń qurylymyn ońtaılandyrý boıynsha 140-qa jýyq fýnktsııalardy taldaý nátıjesinde qaıtalanatyn mindetterin alyp tastaý, keıbir fýnktsııalardy básekelestik ortaǵa berý jáne ortalyqsyzdandyrýǵa qatysty 200-den astam usynys ázirlendi. Máselen, Densaýlyq saqtaý mınıstrligine júrgizilgen taldaý aıasynda eki departament basqarma bolyp qaıta quryldy. Bul jylyna 8,5 mln teńgeni únemdeýge múmkindik berse, al aýyldyq dárigerlerge ýaqytsha eńbekke jaramsyzdyq paraǵyna qol qoıý quqyǵyn berý shamamen 1 mln aýyl turǵynyn aýdan ortalyqtaryna barý qajettiliginen bosatty.
Ekinshiden, protsesterdi tsıfrlandyrý, onlaın platformalardy paıdalaný arqyly kóptegen aqparattyq júıelerdi yqpaldastyrý, qajetsiz qujattardy joıý arqyly rásimderdi jeńildetý boıynsha 170-ten astam usynys ýákiletti organdarǵa engizildi. Úshinshiden, bıýrokratııa men qaǵazbastylyq kórinisterine áser etetin normatıvtik quqyqtyq aktilerdegi olqylyqtar men qaıshylyqtardy zerdeleý nátıjesinde 60-qa jýyq usynys ázirlenip, olar tıisti memlekettik organdarǵa jiberildi.
Jalpy, bıýrokratııalyq kedergilerdi taldaý jáne monıtorıngteý nátıjesinde agenttik Prezıdent Ákimshiligi men Úkimet apparatyna 715 usynys engizdi. Búgingi tańda 100-den asa usynys memlekettik organdar tarapynan oryndaldy. Qalǵanyn zańnamalyq ózgeristerdi engizý arqyly oryndaý kózdelýde.
Qazirgi ýaqytta Energetıka, Sý resýrstary jáne ırrıgatsııa mınıstrlikterinde, sondaı-aq Tótenshe jaǵdaılar mınıstrliginde bıýrokratııadan aryltý boıynsha taldaý júrgizilýde.
Agenttik bastamasymen «E-lıtsenzııalaý» aqparattyq júıesine qol jetkizý arqyly azamattardyń quqyqtarynyń buzylýyn anyqtaýǵa jáne tıisti shaǵymdardy kútpeı-aq olardyń quqyqtaryn qalpyna keltirýge baǵyttalǵan qashyqtyqtan monıtorıng júrgizý jańa tásili tájirıbege engizildi. Osylaısha, bıyl osy aqparattyq júıede júrgizilgen qashyqtyqtan monıtorıng nátıjesinde 15 myńnan astam buzýshylyq anyqtalyp, kórsetiletin qyzmetti berýshiniń 180 qyzmetkeri ákimshilik jáne 161 tártiptik jaýapkershilikke tartyldy, 536 qyzmet alýshynyń quqyqtary qalpyna keltirildi.
Statıstıkaǵa sáıkes, 2024 jyldyń 9 aıynda memlekettik qyzmet kórsetý kezinde 85 myńnan astam buzýshylyq anyqtaldy, onyń 82 paıyzy jergilikti atqarýshy organdarǵa, 18 paıyzy ortalyq memlekettik organdar men olardyń aýmaqtyq bólimshelerine tıesili.
«Otyrys barysynda jer qatynastary salasynda kórsetiletin memlekettik qyzmetterge qatysty máseleler talqylandy. Konsýltatıvtik-saraptamalyq top otyrysynyń qorytyndysy boıynsha ortalyq jáne jergilikti atqarýshy organdarǵa memlekettik apparat qyzmetin bıýrokratııadan aryltý jáne memlekettik qyzmetter kórsetý sapasyn arttyrý jumystaryn jalǵastyrý usynyldy», - dep atap ótedi agenttiktiń baspasóz qyzmetinen.
