9 aıda qaı salalardy óndiris kólemi artty
ASTANA. KAZINFORM – Bıyl 9 aıda óńdeý ónerkásibi 8,6 paıyzǵa ósti. Bul týraly Úkimet otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.
Vıtse-premerdiń aıtýynsha, 9 aıdaǵy el ekonomıkasy ósiminiń negizgi draıverleriniń biri óńdeý ónerkásibi bolyp otyr. Óndiristiń ósýi 8,6%-dy qurady. Bul qańtar-tamyzdaǵy kórsetkishten 0,2 paıyzdyq tarmaqqa joǵary.
- Óńdeý ónerkásibindegi ósý mashına jasaýdaǵy óndiristiń 22,8%-ǵa, onyń ishinde avtomobıl jasaýda – 29,9%-ǵa jáne elektr jabdyqtaryn óndirýde 20,7%-ǵa ósýi esebinen qamtamasyz etildi. Azyq-túlik óndirisi - 13,8%-ǵa, daıyn metall buıymdary – 34,8%-ǵa, farmatsevtıkalyq ónimder – 30,9%-ǵa, hımııa ónerkásibinde – 23,4%-ǵa, rezeńke jáne plastmassa buıymdary – 18,1%-ǵa, qurylys materıaldary 5,9%-ǵa, ósti. Metallýrgııanyń naqty kólem ındeksi qańtar-tamyzdaǵy 97,3%-dan 98,2%-ǵa deıin artty. Bul rette qara metallýrgııada ósý oń aımaqta bekitilip, 2,8%-dy qurady, - dedi ol.
Onyń atap ótýinshe, oń dınamıkaǵa shyǵý úshin taý-ken metallýrgııa kesheniniń iri otandyq kásiporyndaryn shıkizatpen jáne olardyń óndiristik júktelýin qamtamasyz etý jónindegi sharalar ázirlenip, qabyldandy.
Ekonomıkalyq ósýdiń belsendi saıasaty jalǵasyp jatyr.
- Basymdyq beriletin salalardy qarjylandyrý úshin bıýdjetten «Báıterek» holdıngine 540 mlrd teńge bólindi. Holdıng naryqtyq qarjylandyrýdy tartý esebinen 6 trln teńgege jobalardy qarjylandyrdy, - dedi vıtse-premer.
Osyy oraıda Serik Jumanǵarın holdıng mynadaı negizgi jobalardy qarjylandyrǵanyn atap ótti:
- kalıı tyńaıtqyshtaryn óndirý zaýytyn salý;
- azot tyńaıtqyshtaryn óndirý zaýytyn salý;
- alıýmınıı rýlonyn óndirý zaýytynyń qurylysy;
- astyqty keshendi óńdeý zaýytyn salý;
- kirpish zaýytynyń qurylysy.
Aıta keteıik, bıyl 9 aıdyń qorytyndysynda el ekonomıkasynyń ósýi 4,2 paıyzdy qurady.
