9 aıda Astanada merez juqtyrýdyń 505 jaǵdaıy tirkeldi - Dermatologııa jáne JQAAE ortalyǵy
ASTANA. 8 qarasha. QazAqparat /Gúlmıra Alıakparova/ - 2011 jylǵy 9 aıdyń qorytyndysy boıynsha Astana qalasy merez aýrýyn juqtyrý jáne tirkelý faktileri boıynsha respýblıkada ekinshi orynda.
Málimetterdi qala ákimdiginde 1 jeltoqsan - Dúnıejúzilik JQTB-men kúres kúnine oraı ótken baspasóz máslıhatynda Dermatologııa jáne jynystyq qatynastar arqyly beriletin aýrýlardy aldyn ala emdeý ortalyǵynyń bas dárigeri Juldyz Danbaeva keltirdi.
«9 aıdyń ishinde Astanada merez juqtyrýdyń 505 jaǵdaıy tirkeldi. 2010 jyldyń atalmysh kezeńinde - 384 fakti, ósim 1,5 eseni qurady. Sondaı-aq gonokokkti jáne hlamıdııalyq juqpalardyń sany artýda. Biz merez aýrýy boıynsha respýblıkada (9 aıdyń qorytyndysy boıynsha) Almaty oblysynan keıin ekinshi orynda turmyz», - dedi ol.
Al merezben aýyratyn naýqastardyń sany men ony juqtyrýdyń jalpy jaǵdaıy boıynsha, J.Danbaevanyń sózine qaraǵanda, elorda 5-inshi orynda tur. «Astana naýqastardyń jalpy sany boıynsha Almaty, Ońtústik Qazaqstan, Shyǵys Qazaqstan oblystary men Almaty qalasynan keıingi orynda keledi», - atap ótti Ortalyqtyń bas dárigeri.
Sondaı-aq J.Danbaeva atap ótkendeı, sońǵy eki jylda Astanada náresteler arasynda keseldi ishte juqtyrýdyń birde-bir faktisi tirkelgen joq. Degenmen el boıynsha mundaı 5 jaǵdaı oryn aldy. «Merezdi ishte juqtyrý jaǵdaılarynyń tómendeý úderisi bar. Bul jańa zamanaýı emdeý mekemeleriniń ashylýynyń arqasynda múmkin bolyp otyr», - dep túıindedi ol.
