9 aıda 6,3 mln tonna munaı kem óndirildi

— Osy jyldyń qańtar-qyrkúıeginde 69,4 mln tonna munaı óndirildi. Bul ótken jylǵy kórsetkishten 6,3 mln tonnaǵa nemese 8,3%-ǵa tómen. Gaz óndirýdiń naqty kólem ındeksi 91,9%-dy qurady. Basqa paıdaly qazbalardy óndirý 12,7%-ǵa, kómir óndirý — 6,6%-ǵa, metall kenderin óndirý 1,6%-ǵa ulǵaıdy, — dedi ol.

Vıtse-premerdiń aıtýynsha, qurylys joǵary ósý qarqynyn kórsetip otyr. Qurylys jumystarynyń kólemi 11,5%-ǵa ósti. Ósim 17 óńirde tirkeldi. Bul rette eń joǵary ósý Ulytaý, Qyzylorda, Atyraý, Pavlodar oblystarynda, sondaı-aq Shymkent qalasynda baıqaldy. Qurylys jumystary kóleminiń tómendeýi Jetisý, Qaraǵandy, Soltústik Qazaqstan oblystarynda tirkeldi. 

— 13,2 mln sharshy metr turǵyn úı paıdalanýǵa berildi. Bul ótken jyldyń tıisti kezeńinen 2,7%-ǵa artyq. Eń joǵary kórsetkishter Almaty, Mańǵystaý, Pavlodar jáne Jetisý oblystarynda baıqaldy, — dedi vıtse-premer.

Serik Jumanǵarın aýyl sharýashylyǵy men agroónerkásiptik keshen ekonomıka draıverleriniń birine aınalyp otyrǵanyn aıtty. Aýyl sharýashylyǵyndaǵy ósý aýyl sharýashylyǵy ónimderin qaıta óńdeýdiń kúsheıýimen qatar júrip keledi. 

— Aýyl sharýashylyǵyndaǵy óndiristiń ósýi aǵymdaǵy jylǵy qańtar-tamyzdaǵy 5,2%-dan 5,8%-ǵa deıin jedeldedi. Bıyl jalpy egin jınaý alańy 24,2 mln gektarǵa deıin jetkizildi, bul ótken jylmen salystyrǵanda 600 myń gektarǵa artyq. Jyl basynan beri 23 mln tonna astyq jáne 3,7 mln tonna maıly daqyldar jınaldy. Bul rette dándi daqyldardyń aýdany 420 myńǵa 15,6 mln gektarǵa deıin, al maıly daqyldar 1,2 mln-ǵa 5,2 mln gektarǵa deıin ulǵaıtyldy. Eksport kólemi ósýde jáne shetelge jetkiziletin ónim nomenklatýrasy keńeıýde. Osy jyldyń qańtar-shildesiniń qorytyndysy boıynsha agroónerkásiptik keshen óniminiń eksporty 4,9 mlrd dollardy qurady. Bul ótken jylǵy sáıkes kezeńiniń kórsetkishinen 33%-ǵa joǵary, — dedi ol.

Aıta keteıik, bıyl 9 aıdyń qorytyndysynda el ekonomıkasynyń ósýi 4,2 paıyzdy qurady.