9 aı ishinde aǵymdaǵy shottyń tapshylyǵy 5 mlrd dollardy qurady
Taýarlar eksporty 2016 jylǵy 9 aıdaǵy uqsas kórsetkishpen salystyrǵanda 31,1 paıyzǵa nemese 8,3 mlrd AQSh dollaryna ulǵaıyp, 35,1 mlrd AQSh dollaryn qurady. Bul rette munaı jáne gaz kondensaty eksportynyń quny 36,6 paıyzǵa, qara jáne tústi metaldar eksporty tıisinshe 59,1 jáne 20,9 paıyzǵa ósti.
Taýarlar ımporty 15,6 paıyzǵa ulǵaıyp, 23,1 mlrd AQSh dollary boldy. Importtyń ósimi negizgi taýar nomenklatýrasynyń barlyq toptary boıynsha boldy. Eń kóp ulǵaıý azyq-túlikke jatpaıtyn tutyný taýarlaryn jáne aralyq ónerkásiptik tutyný taýarlaryn ákelý boıynsha oryn aldy. Nátıjesinde saýda balansynyń oń saldosy 77 paıyzǵa ósip, 12 mlrd AQSh dollary boldy.
Sheteldik tikeleı ınvestorlarǵa kiristerdi tóleý 1,5 esege ósýi saldarynan ınvestıtsııalyq kirister balansynyń teris saldosy 2017 jylǵy 9 aıda 12,3 mlrd AQSh dollaryn qurady. Sheteldik tikeleı ınvestorlar bul kiristerdiń jartysynan astamyn Qazaqstandaǵy enshiles kásiporyndaryna qaıta ınvestıtsııalady.
Qarjy shoty boıynsha kapıtal aǵyny(Ulttyq Banktiń rezervtik aktıvterimen operatsııalardy qospaǵanda) aldyn ala baǵalaý boıynsha 6,6 mlrd AQSh dollaryn, sheteldik tikeleı ınvestıtsııalar (ShTI) boıynsha kapıtal aǵyny 3,3 mlrd AQSh dollaryn qurady. Qazaqstandyq kásiporyndar aǵymdaǵy jylǵy 3-toqsanda júrgizgen, úlestes tulǵalar aldyndaǵy fırmaaralyq bereshekti óteý boıynsha aıtarlyqtaı tólemder ShTI taza ákelinýiniń qysqarýyna yqpal etti.
«Portfeldik ınvestıtsııalar boıynsha kapıtaldyń taza ákelinýi 8,4 mlrd AQSh dollaryn qurady, bul rezıdentterdiń sheteldik baǵaly qaǵazdarǵa ornalastyrylǵan aktıvteriniń tómendeýi, sondaı-aq banktik emes sektordyń kapıtaldyń halyqaralyq naryqtarynda eýrooblıgatsııalar shyǵarýy esebinen oryn aldy. Basqa ınvestıtsııalar boıynsha qarjy resýrstarynyń elden áketilýi kóp jaǵdaıda rezıdentterdiń sheteldik shottardaǵy qysqa merzimdi aktıvteriniń ósýine baılanysty boldy. Rezervtik aktıvter (QR Ulttyq qorynyń aktıvterin eseptemegende) 2017 jylǵy 1 qazandaǵy jaǵdaı boıynsha 32,2 mlrd AQSh dollaryna (jyl basynda 29,5 mlrd AQSh doll.) baǵalandy, bul qazaqstandyq taýarlar men qyzmetter ımportyn 9,1 aı qarjylandyrýdy qamtamasyz etedi», - delingen UB aqparatynda.