9 adam qaza tapqan Atyraý oblysyndaǵy jol apaty: Jańa málimetter aıtyldy
ATYRAÝ. QazAqparat –Atyraý oblysynda 9 adam qaza tapqan jol-kólik apatyna qatysty jańa málimetter paıda boldy, dep habarlaıdy QazAqparat.
4 qazan kúni Atyraý oblysyndaǵy Atyraý-Aqtóbe tasjolynda eki kólik soqtyǵysyp, saldarynan eki kóliktiń júrgizýshisi, jolaýshylary – barlyǵy 9 adam túgeldeı kóz jumǵan bolatyn. QR Іshki ister mınıstri Erlan Turǵymbaev oqıǵa boıynsha tergeý bastalǵanyn aıtty.
Oblystyq Polıtsııa departamenti baspasóz qyzmetiniń málimetinshe, «Renault Duster» kóliginde Maqat aýdanynyń turǵyndary bolǵan. Kólikti 57 jastaǵy júrgizýshi basqarǵan. Salonda 55 jastaǵy áıeli men 15 jastaǵy uly, sondaı-aq 36 jastaǵy týysy bolǵan. Al, «Geely» kóliginiń júrgizýshisi Atyraý qalasyna irgeles ornalasqan Tomarly aýylynyń 36 jastaǵy turǵyny ekeni anyqtaldy. Kólikte Qyzylqoǵa aýdanynyń Jangeldın aýylynan 67 jastaǵy áıel men Atyraý qalasynyń úsh turǵyny otyrǵan. Olar – 63 jastaǵy er adam men 63 jáne 38 jastaǵy áıelder. Barlyǵy – týysqandar.
Atalǵan faktige qatysty QR Qylmystyq kodeksiniń 345-babynyń 4-bóligimen (Eki nemese odan da kóp adamnyń ólimine ákep soqqan, kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) qylmystyq is qozǵalǵan.
