9,4 mln qazaqstandyq mobıldi azamattar bazasyna tirkeldi
«Azamattarǵa arnalǵan úkimet» memlekettik korporatsııasynyń qyzmetkerleri karantın engizilgennen keıin naýryz aıynan beri 1,6 mıllıon azamatty mobıldi azamattar bazasyna (MAB) tirkedi. Jalpy, mobıldi quraldar arqyly memlekettik qyzmetterdi onlaın alýǵa múmkindik beretin bul bazany qazirgi tańda 9,4 mıllıon qazaqstandyq qoldanýda.
«Azamattarǵa arnalǵan úkimet» KEAQ basqarma tóraıymy Ásemgúl Baltashevanyń aıtýynsha, Qazaqstan boıynsha memlekettik korporatsııanyń birqatar mamany qaıta daıarlaýdan ótip, vıdeokeńesshi retinde azamattardy qashyqtyqtan MAB-na tirkeýge kirisken.
«Qazir 1414 sall-ortalyǵynda bir jarym myń adam jumys isteıdi. Sonyń ishinde 400 vıdeokeńesshi onlaın tártipte turǵyndardy mobıldi azamattar bazasyna tirkeýmen aınalysady. Osynyń nátıjesinde koronavırýs indeti kezinde de bul úrdis toqtamaı, sońǵy 5-6 aı ishinde memlekettik qyzmetterdi mobıldi quraldar men egov.kz portaly arqyly alýshylardyń qatary 1,6 mıllıonǵa artty», - deıdi Ásemgúl Baltasheva.
MAB-qa tirkelgen tulǵalar memlekettik qyzmetterge eGovMobile qosymshasy, EgovKzBot2.0 telegram-boty arqyly qol jetkizip, sondaı-aq proaktıvti qyzmetter men basqa da servısterdiń ıgiligin kóre alady. Onyń ústine MAB qoldanýshylaryna qujattyń daıyn bolǵandyǵy nemese ETsQ merziminiń ótip bara jatqandyǵy týraly sms-habarlama keledi.
Aıta ketý kerek, mobıldi azamattar bazasyna egov.kz elektrondyq úkimet portalyndaǵy jeke kabınet arqyly nemese egov.kz vırtýaldy keńesshisiniń kómegimen tirkelýge bolady.
Mobıldi azamattar bazasyndaǵy tirkeýdi tekserý úshin egov.kz elektrondyq portalyndaǵy «Servıster» bólimin qaraý kerek.
