9-20-25 jáne 7-20-25 baǵdarlamalarynyń bir-birinen aıyrmashylyǵy nede

«Otbasy bank» AQ basqarma tóraǵasy Lázzat Ibragımova 2024 jyly iske qosylatyn «9-20-25» jańa ıpotekalyq baǵdarlamasynyń sharttaryn túsindirdi, dep habarlaıdy Kazinform. 

«9-20-25» baǵdarlamasynda úmitkerde sońǵy 5 jylda baspanasy bolmaýy kerek degen shart jazylady», — dedi Lázzat Ibragımova Ortalyq kommýnıkatsııalar qyzmetinde ótken brıfıngte.

Sondaı-aq, «Otbasy bank» basshysyna jańa ıpotekalyq baǵdarlamany iske qosqanda «7-20-25» baǵdarlamasynda jiberilgen qatelikter eskerile me degen suraq qoıyldy.

«Biz bul usynysty qoldaımyz. Sebebi, Qazaqstandyq turǵyn úı baǵdarlamasy úlestik qurylys naryǵynyń adal ári ashyq bolýyna zor úles qosady dep sanaımyz. Eger obektide QTÚK kepildigi bolsa, nysan qurylysy tolyq aıaqtalady. Biz „9-20-25“ baǵdarlamasyna tek daıyn turǵyn úı ǵana emes, QTÚK kepildigimen salynyp jatqan turǵyn úı de qatysýy kerek degen usynysty qoldaımyz», — dedi Lázzat Ibragımova.

Spıker banktiń qurylys salýshylarmen jıi kezdesetinin jáne qosymsha máselelerdi bilip otyratynyn aıtty.

«Mysaly, „7-20-25“ baǵdarlamasyna qatysý sany boıynsha shekteýler bolǵan joq. ıAǵnı, klıent 2019 jyly páter satyp alyp, baspana baǵasynyń ósýin paıdalanyp, ony sata aldy jáne 2021 jyly qaıtadan ıpotekalyq baǵdarlamaǵa qatysa aldy. Bul baǵdarlamada oǵan tyıym salynady. Adam tek bir ret qatysady. Budan basqa, „9-20-25“ baǵdarlamasynda ótinim berý kezinde 5 jyl boıy turǵyn úı bolmaýy tıis. Bul baǵdarlamada, sondaı-aq jas ǵalymdar baǵdarlamasynda qatań sharttar bar. Biz muny memlekettik derekter bazasy arqyly tekseretin bolamyz», — dep tolyqtyrdy «Otbasy bank» basshysy.

Aıta keteıik, Otbasy bank jas ǵalymdarǵa páter beretin jańa baǵdarlamany iske qosty.