«9-20-25» ıpotekasy qashan iske qosylady

ASTANA. KAZINFORM – «9-20-25» jańa ıpotekalyq baǵdarlamasy iske qosylatyn kún belgili boldy. Bul týraly QR Premer-mınıstri Qostanaı oblysyna jumys sapary barysynda aıtty, dep jazdy Krysha.kz.

«Biz jastarǵa arnalǵan «9-20-25» baǵdarlamasyn ázirledik. Ony 1 naýryzdan bastap «Otbasy banki» arqyly iske qosamyz», - dedi Álıhan Smaıylov jergilikti «Novaıa gazeta» basylymynda jarııalanǵan vıdeoda.

Onyń aıtýynsha, baǵdarlamaǵa bıyl 150 mlrd teńge bólinedi.

«Osylaısha, 8 myńǵa jýyq adam «9-20-25» ıpotekasyn rásimdeı alady», - dep túsindirdi Smaıylov.

Ipoteka sharttary kelesideı bolatyny buryn jarııalanǵan bolatyn:
— syıaqy mólsherlemesi — jyldyq 9%;
— bastapqy jarna — 20%;
— nesıe merzimi — 25 jyl.

Baǵdarlamaǵa qatysýshylardyń ótinim bergen kezde bes jyl boıy jeke baspanasy bolmaýy tıis.