«9-20-25» baspana baǵdarlamasy keler jyldan bastap iske qosylady - Smaıylov

Premer-Mınıstr Álıhan Smaıylov elimizde jaqyn arada jańa turǵyn baǵdarlamasy iske qosylatynyn málim etti, dep habarlaıdy Kazinform.

Búgin Senattyń jalpy otyrysynan keıin tilshiler Úkimet basshysynan «9-20-25» turǵyn úı baǵdarlamasy qashan iske qosylatynyn surady.

«Turǵyndar tarapynan «7-20-25» baǵdarlamasyna keńinen suranys boldy. Biraq bul baǵdarlamany iske asyrýǵa qarajat kerek. Ulttyq bank óziniń lımıtin qoıǵan edi. Bul lımıt suranys turǵysynan jetkiliksiz. Ulttyq bank mundaı shekteý qoıǵannan keıin Úkimet aıasynda, sondaı-aq Otbasy bank jáne «Báıterek» holdıngi birlesip qosymsha baǵdarlama ázirlep jatyrmyz. Ol - «9-20-25» baǵdarlamasy», - dedi Á. Smaıylov.

Onyń aıtýynsha, jańa baǵdarlama boıynsha 25 jylǵa 9 paıyzdan ıpotekalyq nesıe beriledi.

«Qazirgi jaǵdaıda 9 paıyz degen tómen mólsherleme sanalady. Sony iske asyrý úshin tıisti esep-qısapty jasap otyrmyz. Oǵan jyl saıyn 150 mlrd teńge kerek jáne 8 myń otbasy nemese adamǵa osy ıpotekany alýǵa múmkindik beriledi. Ol úshin 100 mlrd teńgeni naryqtan tartýymyz qajet, al Otbasy bank óziniń taza tabysynan 50 mlrd teńge bólýi tıis. Osy qarajatty qosyp, 9 paıyzdyq stavkaǵa shyǵý kerek. Bul baǵdarlama negizinen jastarǵa arnalady dep sanaımyn», - dedi Úkimet basshysy.

Osy oraıda ol baǵdarlama jaqyn arada iske qosylatynyn aıtty.

«Keler jyly osy baǵdarlama júzege asady», - dep naqtylady Premer-Mınıstr.