9/11 lańkestigin uıymdastyrdy degen kúdiktilerge qaıtadan aıyptar taǵyldy
ASTANA. 1 maýsym. QazAqparat - AQSh Áskerı prokýratýrasy 2001 jyldyń 11 qyrkúıegindegi lańkestik áreketti uıymdastyrýǵa qatysy bar degen bes kúdiktige,
olardyń qatarynda Halıd Sheıh Mohammed te bar, qaıtadan aıyp taǵyp otyr. 2009 jyldyń qańtarynda Prezıdent Barak Obama Gýantanamo túrmesindegi áskerı prokýratýranyń barlyq qyzmetin toqtatý týraly ókim shyǵaryp, atyshýly mekemeni jabýǵa ýáde bergennen keıin, atalǵan kúdiktilerge taǵylǵan burynǵy aıyptaýlardan bas tartýǵa týra kelgen bolatyn, dep habarlaıdy «RIA «Novostı» agenttigi.
Degenmen, Prezıdenttiń ol ýádesi oryndalýsyz qaldy. Kongresten qoldaý tappaǵan soń, Obama 2011 jyldyń naýryz aıynda Gýantanamo túrmesinde otyrǵan kúdiktilerge qatysty áskerı sottardy qaıta jandandyrý týraly nusqaý berdi. Al sáýir aıynyń basynda AQSh Bas prokýrory Erık Holder 9/11 isi boıynsha aıyptalǵan Halıd Sheıh Mohammed pen taǵy tórt azamattyń AQSh Azamattyq sotyna emes, Gýantanamo bazasyndaǵy arnaıy áskerı komıssııanyń aldynda jaýap beretinin qýattady.
