88 múgedek balany asyrap alǵan otbasy jaqsylyqtan úmit úzbeıdi
ASTANA. QazAqparat - Kamılla Djeraldı men onyń joldasy Maık 40 jyl ishinde túrli deńgeıde patologııalyq syrqatpen týǵan balalardy asyrap alǵan. Otbasy atalǵan merzim ishinde 88 balaǵa jylýlyq syılaǵan, dep jazady life.ru.
Kamılla men Maık 70-jyldarda tanysqan. Ol kezde Kamıla medbıke, onyń bolashaq jubaıy balalar dáriger bolyp jumys istegen. Sol ýaqytta Kamılanyń úsh asyrandy balasy bolǵan. Ol óziniń múgedek balalardy qutqaryp qalý armany ekendigin aıtqan kezde, oǵan Maık birden qoldaý bildirgen.
Qazirgi kezde juptyń asyrap alǵan balalarynyń úlkeni 32-i jasta. Kishisi 8-de. Osy ýaqyt ishinde olar derti aýyr 32 balasynan aıyryldy. Qaıyrymdy otbasy bas súıeginiń bir bóligi joq balaǵa da aıtarlyqtaı kútim jasaı bildi.
Jaqsylyq jasaýdan lázzat alatyn otbasynyń úıin 1992 jyly "Endrıý" daýyly qıratyp ketti. 2015 jyly úılerine jaı túsip, barlyq múlki janyp ketti. Qıynshylyq munymen bitpedi, búgindi Kamılla múgedek balalarmen jalǵyz ózi qalyp otyr, onyń jubaıy Maık ótken jyly obyr dertinen kóz jumdy.
Alaıda qaısar Kamılla bul qıyndyqqa moıynsunyp otyrǵan joq. Bir jaqsylyqtyń bolaryna úmittenedi. Qazirgi kezde olar Possible Dream qorynyń qarajatyna kún kórýde.
