8,7 magnıtýda: Kamchatka tarıhynda eń kúshti jer silkinisi tirkeldi
ASTANA. KAZINFORM — Kamchatkada bolǵan jer silkinisiniń magnıtýdasy ártúrli baǵalar boıynsha 8,7-ge jetken. Bul — 1952 jyldan bergi eń kúshti jer silkinisi, dep jazdy TASS agenttigi.
— Jańa ǵana 1952 jyldan beri Kamchatkanyń seısmofokaldyq aımaǵynda eń kúshti jer silkinisi tirkeldi. Magnıtýdasy ártúrli baǵalar boıynsha 8,7-ge jetip otyr. Bul, sózsiz, asa mańyzdy oqıǵa, — dep habarlady Reseı Ǵylym akademııasynyń Birikken geofızıkalyq qyzmetiniń Kamchatkadaǵy bólimshesi Telegram-arnasynda.
Jer silkinisiniń oshaǵy 2025 jylǵy 20 shilde men 2024 jylǵy 17 tamyzda bolǵan jer silkinisteriniń oshaqtarymen ońtústik-batystan shektesip jatyr. Jer jaryǵy tereń teńiz jyrasy boıymen ońtústik-batys baǵytta kem degende 200 shaqyrymǵa deıin taraǵan.
Ǵalymdar bul seısmıkalyq oqıǵany klassıkalyq sýbdýktsııalyq (lıtosferalyq plıtalardyń bir-biriniń astyna kirýi nátıjesinde bolatyn) jer silkinisi dep baǵalap otyr jáne odan kútpegen saldar bolmaıdy dep boljaýda. Aldyn ala baǵalaý boıynsha, Petropavlovsk-Kamchatskıı qalasynda jer silkinisiniń kúshi keminde 6 ballǵa jetken.
Kamchatka jaǵalaýynda jáne Soltústik-Kýrılsk qalasynda qaýipti, kúshti tsýnamı tirkeldi.
Kúshti jer asty dúmpýi Kamchatkada jergilikti ýaqytpen saǵat 11:26–da (Máskeý ýaqytymen 02:26) boldy.
Aımaq basshysynyń sheshimimen Petropavlovsk-Kamchatskıı qalasynda jumys kúni qysqartyldy. № 1 qalalyq balalar emhanasynyń ǵımaratyna zaqym kelgendikten onyń jumysy ýaqytsha toqtatyldy.
Qalada kólik keptelisteri, janarmaı quıý beketterindegi uzyn kezekter, elektr jaryǵy men mobıldi ınternettiń úzilýi baıqaldy. Kóptegen turǵyndar kóshege júgirip shyqqan.
Kamchatkadaǵy tańǵy kúshti jer silkinisinen keıin birneshe adam medıtsınalyq mekemelerge júgingen.
Kamchatka ólkesiniń densaýlyq saqtaý mınıstri Oleg Melnıkovtyń aıtýynsha, barlyq zardap shekkenderdiń jaǵdaıy qanaǵattanarlyq.
Eske sala keteıik, Petropavl-Kamchatskıı qalasynan 99 shaqyrym qashyqtyqta magnıtýdasy 5,2 bolatyn jer silkinisi tirkelgenin jazǵan edik.