864 ákim halyqtyń tikeleı daýys berýi arqyly qyzmetke keldi

NUR-SULTAN. QazAqparat – Aýyldyq okrýg ákimderin tikeleı saılaý nátıjesi saıası partııalardyń belsendilik deńgeıine sáıkes keledi. QR Prezıdenti Ákimshiligi Basshysynyń orynbasary Málik Myrzalın «Habar 24» telearnasyna bergen suhbatta osyndaı oı aıtty, dep habarlaıdy QazAqparat tilshisi.

«Bul saılaýǵa alty partııanyń da ókilderi qatysty.Saılanǵan 864 ákimniń 77,7%-y nemese 671 adam Nur Otan-nyń ókili boldy. «Aýyl» partııasynan 3,8% ıaǵnı 33 adam ákim atansa, «Adal» partııasynan 1,7%, ıaǵnı 15 ákim, «Aqjol» partııasynan 1,4% nemese 12 adam, Qazaqstan halyq partııasynan 1,3% nemese 11 adam jáne JSDP-dan 0,1%, ıaǵnı 1 adam ákim atandy. Mundaı nátıje partııalardyń saılaý kezeńindegi de, qalypty kezdegi de saıası belsendilik deńgeıine sáıkes keletinin atap ótý kerek» – dedi Málik Myrzalın.

Suhbat barysynda Málik Myrzalın bıyl 864 ákim qyzmetke halyqtyń tikeleı daýys berýi arqyly kelgenin aıtty.

Sondaı-aq ol daýys berýshilerdiń aýyl ákimderiniń saılaýyna belsendi qatysqanyn atap ótti.

«Qazaqstan boıynsha saılaýshylardyń ortasha kelý kórsetkishi 78,5% boldy. Aýyldyq okrýgterde árdaıym halyq saılaýǵa belsendi qatysady», - dedi Prezııdent ákimshiligi basshysynyń orynbasary.