860 tekserý, 260 aıyppul: Múgedektigi bar adamdar quqyǵyn qorǵaý kúsheıdi
ASTANA. KAZINFORM — Jyl basynan beri halyqtyń áleýmettik osal toptarynyń quqyqtaryn qorǵaý maqsatynda áleýmettik ınspektorlar 860-tan astam tekserý júrgizdi, dep habarlaıdy Eńbekmıni.
2025 jyldyń basynan beri áleýmettik ınspektorlar 860 tekserý júrgizdi, onyń 343-i jospardan tys, 272 — profılaktıkalyq baqylaý sheńberinde, 245 — prokýratýranyń talaby boıynsha ótti. Tekserý qorytyndysy boıynsha anyqtalǵan buzýshylyqtardy joıý týraly 405 uıǵarym berildi, 54,3 mln teńgeden astam somaǵa 260 aıyppul salyndy.
Memlekettik baqylaýmen: ákimdikter — 50, jergilikti atqarýshy organdardyń bólimderi men basqarmalary — 214, memlekettik mekemeler — 63, balabaqshalar — 35, mektepter — 89, kolledjder, lıtseıler — 13, aýrýhanalar, emhanalar — 83, arnaýly áleýmettik qyzmetter kórsetý ortalyqtary — 55, avtobýs parkteri, avto/temir jol vokzaldary, áýejaılar — 39, DK — 25, dúkender — 57, saýda úıleri — 10, kafeler, meıramhanalar, qonaq úıler — 16, polıtsııa pýnkti — 6, stomatologııa — 6, kitaphana — 3, mádenıet úıleri — 10, muraǵattar men murajaılar — 3, sanatorııler — 3, poshta qyzmeti bólimshesi — 6, sport mektepteri — 14, notarıýs — 1, bankter — 11, ońaltý ortalyqtary — 2, ózge de 46 obekti qamtyldy.
Osylaısha, QR EHÁQM Halyqty áleýmettik qorǵaý salasyndaǵy retteý jáne baqylaý komıtetiniń Soltústik Qazaqstan oblysy boıynsha departamenti 1-toptaǵy múgedek Karıma Aqjannyń ótinishi negizinde «Qazaqtelekom» AQ fılıalynyń aýdandyq bólimshesine halyqtyń júrip-turý múmkindigi shekteýliligi máselesi boıynsha jospardan tys tekserý júrgizdi. Tekserý qorytyndysy boıynsha sýbektige uıǵarym shyǵarylyp, qazirgi ýaqytta ol tolyǵymen oryndaldy.
— Men Amanat partııasy Soltústik Qazaqstan oblystyq fılıaly janyndaǵy nysandardy beıimdeý jónindegi aımaqtyq monıtorıngtik toptyń múshesimin. Jumys toby áleýmettik ınfraqurylym nysandaryn, atap aıtqanda, vokzal, avtovokzal, Halyq banki, HQO jáne basqa da nysandardy aralaǵanda, azamattardyń barlyq sanattary úshin qoljetimdilik turǵysynan oń ózgeristerdi baıqadym. Nysandar múgedekter arbasyna tańylǵan jandarǵa, kórý qabileti jáne estý qabileti nashar azamattarǵa, júrip-turý múmkindigi shekteýli adamdarǵa beıimdelgen. Kireberis tolyǵymen qaıta jańartylyp, pandýstardyń parametrleri standarttarǵa sáıkes jasalǵan, perronǵa yńǵaıly shyǵý úshin temirjol vokzalynda lıftter ornatylyp, barlyq nysandarda dárethanalar jabdyqtaldy — Braıl jazýy bar belgiler, ilgekter, tutqalar, taktıldi baǵyttaýshy jolaqtar jáne t. b. Soltústik Qazaqstan oblysynda Halyqty áleýmettik qorǵaý salasyndaǵy retteý jáne baqylaý komıtetiniń departamentimen baqylaý tıisti deńgeıde júrgizilýde. Men óz basym múgedekterge qoljetimdilikke qatysty máseleler boıynsha bólim mamandaryna únemi habarlasyp turamyn, olar meniń kez kelgen suraqtaryma oń nátıje beretin tolyq ári jan-jaqty jaýap beredi, — dep atap ótti Soltústik Qazaqstan oblysy ákiminiń múgedektik máseleleri jónindegi keńesshisi Vladımır Erman, 1-toptaǵy múgedek.
Osydan buryn Jetisýda sheneýnik múgedektik qujatyn bergeni úshin 450 myń teńgeden para alyp otyrǵany anyqtaldy.