86 jastaǵy qarııanyń bıi taldyqorǵandyqtardy tańǵaldyrdy
TALDYQORǴAN.QazAqparat - Búgin Іlııas Jansúgirov atyndaǵy Mádenıet saraıynda ardagerler uıymynyń 30 jyldyq mereıtoıyna oraı «Qarttardyń da ónerge bar talasy» atty óner baıqaýynyń gala-kontserti ótti.
Kontsertke qatysýshylardyń eń úlkeniniń jasy 86-da, dep habarlaıdy QazAqparat oblys əkiminiń baspasóz qyzmetine silteme jasap.
Gala-kontsertte qarııalar ózderiniń ónerlerin ortaǵa saldy.
Oblystyń túkpir-túkpirinen kelgen ardagerler ulttyq bı bılep, án saldy, sıqyr kórsetti. Olardyń hormen salǵan ánderi, orkestrmen oryndalǵan kompozıtsııalary da áserli shyqty.
Jambyl aýdanynyń turǵyny 86 jastaǵy Úmitjan Botbaeva qazaqtyń ulttyq bıin bılep, kórermenderdi tamsantty. Úmitjan apa - Jambyl aýdandyq ardagerler ansambliniń bıshisi.
Oblys əkimi Amandyq Batalov ta Úmitjan apanyń bıine tənti ekenin jetkizdi.
"Jastaryńyzdyń ulǵaıǵanyna qaramastan boılaryńyzdaǵy kúsh-qýat, ónerge degen súıispenshilikterińiz jastarǵa úlgi bolyp qana qoımaı, olardy rýhanı jaǵynan baıyta tústi. Mundaı kontsertterdi oblystyń ár aýmaǵynda ótkizýge bolady. Biz tipti sizderdiń respýblıkalyq jáne halyqaralyq deńgeıdegi sharalarda kórsetetin ónerlerińizge qoldaý kórsetýge daıynbyz"- dedi ardagerlerdi quttyqtaǵan óńir basshysy Batalov.
Gala-kontsertti Qazaqstannyń Halyq ártisi, Memlekettik syılyqtyń laýreaty Nurǵalı Núsipjanov tamashalap, qarııalardy shyn júrekten quttyqtady.
