85 muǵalim jumyssyz qalýy múmkin: Almaty oblysynyń ustazdary janaıqaıyn jetkizdi

QONAEV. KAZINFORM — Almaty oblysynda 85 muǵalim jumystan bosatylýy múmkin. Osy jaǵdaıǵa qatysty óńir ákimdigi túsinik berdi. 

Shelek aýylyndaǵy Álııa Moldaǵulova atyndaǵy mekteptiń ustazdary Memleket basshysy men oblys ákimi Marat Sultanǵazıevke vıdeoúndeý joldady.

Aıtýlarynsha, eldi mekende jańa mekteptiń ashylýyna baılanysty 44 jyldyq tarıhy bar eski mektepte synyptar jabylyp jatyr. Ossynyń saldarynan 85 muǵalim jumyssyz qalýy múmkin.

Shelek aýylyndaǵy Álııa Moldaǵulova atyndaǵy orta mektep muǵalimderiniń ótinishimen Almaty oblysy Eńbekshiqazaq aýdandyq bilim bóliminiń basshysymen kezdesý ótti.

Jıyn barysynda ustazdar qaýymy beıneúndeýde aıtylǵan máseleler boıynsha túsinikteme aldy.

Bilim bóliminiń basshysy búgingi kúnge deıin Á.Moldaǵulova atyndaǵy orta mektepten 279 oqýshy men 12 muǵalimniń jańa mektepke aýysqanyn jáne muǵalimderdiń jumys ýaqytynyń qysqarý qaýpi joq ekenin atap ótti. 

«Qazir Á.Moldaǵulova atyndaǵy orta mektepte 543 oqýshy bilim alyp jatyr. Aldaǵy ýaqytta da, atalǵan mekteptiń oqýshylary jańa mektepke aýysqan jaǵdaıda da muǵalimder jumyspen qamtylatyn bolady. Qazirgi ýaqytta mekteptegi oqý úrdisi bekitilgen kestege sáıkes júrip jatyr», — dep atap ótti oblys ákimdiginen.