8,5 mlrd teńgeni jymqyrǵan qurylys kompanııasynyń basshysy Reseıden ekstradıtsııalandy

ASTANA. KAZINFORM - Qazaqstan Bas prokýratýrasynyń suraý salýy boıynsha Reseı Federatsııasynan bıýdjet qarajatyn asa iri mólsherde jymqyrdy degen kúdikke ilingen azamat ekstradıtsııalandy.

Tergeý barysynda atalǵan tulǵa qurylys kompanııasynyń basshysy bola otyryp, 2020 jyldan 2022 jylǵa deıingi aralyqta adamdar tobymen aldyn ala sóz baılasý arqyly jalǵan sharttar jasasyp, affılırlengen kompanııalar arqyly aqsha qarajatyn aýdarý jolymen «Samuryq-Energo» AQ-nyń enshiles uıymynan 8,5 mlrd teńgeden astam bıýdjet qarajatyn jymqyrǵany anyqtaldy.

Atalǵan qarajat Aqmola oblysynda jel elektr stantsııasyn salýǵa arnalǵan bolatyn. Qylmys jasaǵannan keıin kúdikti jasyrynyp, oǵan halyqaralyq izdeý jarııalanǵan.

Osy jyldyń aqpan aıynda ol Reseı Federatsııasynyń aýmaǵynda ustalyp, Qazaqstan Respýblıkasy Bas prokýratýrasynyń suraý salýy boıynsha ony ekstradıtsııalaý týraly sheshim qabyldandy.

- Qazirgi ýaqytta kúdikti tergeý ızolıatoryna qamaldy. Qylmysqa qatysy bar basqa tulǵalar osy jyldyń mamyr aıynda ártúrli merzimge bas bostandyǵynan aıyrý jazasyna sottaldy. Qylmystyq zańmen aıyptalǵan áreketti jasaǵany úshin múlki tárkilenip, 5 jyldan 10 jylǵa deıingi merzimge bas bostandyǵynan aıyrý jazasy qarastyrylǵan, - delingen Bas prokýratýra habarlamasynda.

Bas prokýratýra shetelde jasyrynyp júrgen tulǵalardy izdestirý jáne olardy qylmystyq jaýaptylyqqa tartý boıynsha júıeli jumys júrgizýdi jalǵastyryp jatqanyn málimdedi.

Buǵan deıin 7 jyl boıy jasyrynǵan eks-quqyq qorǵaýshy Túrkııadan ekstradıtsııalanǵanyn jazǵan edik.

Qyz zorlap, 13 jyl jasyrynyp júrgen kúdikti Qyrǵyzstannan ekstradıtsııalandy.

Asa iri kólemde esirtki satqan qazaqstandyq Reseıden ekstradıtsııalandy.