8,5 mln teńge: qomaqty ınvestıtsııalyq dıvıdent kútken aqmolalyq alaıaqqa uryndy

KÓKShETAÝ. KAZINFORM – Jalǵan ınvestıtsııalyq platforma «keńesshilerine» sengen er adam 8,5 mln teńgeden astam qarajatynan aıyryldy. Bul týraly Kazinform agenttiginiń tilshisi habarlady.

Aqmola oblysy polıtsııa departamentiniń baspasóz qyzmetiniń málimetinshe, iri ınternet-alaıaqtyqtyń qurbany Arshaly aýdanynyń turǵyny bolǵan.

— Alǵashqy tergeý áreketteri barysynda anyqtalǵandaı, ótinish berýshi jalǵan «QazAtomProm» ınvestıtsııalyq platformasynyń jarnamasyn TikTok qosymshasynan kórgen. Alaıaqtar áleýetti salymshylardyń senimine kirý úshin belgili kompanııanyń ataýyn paıdalanǵan. Jarnamada paıdalanýshylarǵa munaı, altyn jáne kúmis sııaqty shıkizat resýrstaryna ınvestıtsııa salýdan joǵary tabys ýáde etilgen, — dep málimdedi vedomstvo.

Tirkeýden ótkennen keıin aqmolalyqpen ózin kompanııanyń «menedjeri» retinde tanystyrǵan adam baılanysqa shyqqan. Ol ınvestıtsııalaý júıesi týraly egjeı-tegjeıli aıtyp, salynǵan qarajattyń joǵary tabys ákeletinine sendirgen. Jyldam paıda tabýǵa úmittengen azamat onyń sózine senip, kórsetilgen shottarǵa aqsha aýdara bastaǵan.

Jalpy alǵanda, er adam dropperlerdiń shottaryna 10 tranzaktsııa arqyly 8 mıllıon 850 myń teńge aýdarǵan. Qarajatty alǵannan keıin alaıaqtar baılanysqa shyǵýyn toqtatqan. Ýáde etilgen dıvıdendter túspegen soń, jábirlenýshi alaıaqtardyń qurbany bolǵanyn túsinip, polıtsııaǵa aryzdanǵan.

— Atalǵan fakt boıynsha sotqa deıingi tergeý bastaldy. Qylmysqa qatysy bar tulǵalardy anyqtaý maqsatynda jedel-izdestirý sharalary júrgizilip jatyr, – dedi polıtsııa ókilderi.

Polıtseıler azamattardy taǵy da eskertedi: sońǵy ýaqytta «ınvestıtsııalyq platformalarǵa» baılanysty ınternet-alaıaqtyq faktileri kóbeıgen. Qaskóıler áleýmettik jeliler men messendjerlerde belsendi túrde jarnama taratyp, joǵary ári tez tabys tabýǵa ýáde beredi.

Aıta keteıik, buǵan deıin BQO-da alaıaqtar jábirlenýshilerge 260 mln teńgeden asa zalal keltirgenin jazdyq.